Кина се соочува со загрижувачка епидемија на чикунгуња, вирус што се пренесува преку комарци, при што се пријавени илјадници случаи во јужниот дел на земјата.
Околу 7.000 инфекции се регистрирани во провинцијата Гуангдонг оваа година, при што градот Фошан е епицентарот. Според државната телевизија CCTV, хоспитализираните пациенти таму спијат под мрежи против комарци.
Иако епидемиите на чикунгуња се ретки во Кина, брзината на ширење – речиси 3.000 случаи во последната недела – предизвикува сериозна загриженост. Освен Фошан, најмалку 12 други градови во Гуангдонг пријавиле случаи.
Кинеските власти изјавија дека случај „увезен од странство“ ја предизвикал локалната трансмисија во јули, но не наведоа од каде потекнува инфекцијата.
Во неделата, Хонг Конг го пријави првиот случај – 12-годишно момче кое патувало во Фошан и подоцна развило треска, осип и болки во зглобовите.
Според кинеските власти, сите случаи досега се со блага форма и повеќето пациенти се опоравуваат брзо.
Што е чикунгуња и како се шири?
Чикунгуња првпат била идентификувана во Танзанија во 1952 година, а оттогаш се проширила во над 110 земји, најчесто во Африка, Југоисточна Азија и Пацификот.
Симптоми што обично се јавуваат во рок од една недела по каснување од инфициран комарец вклучуваат: висока температура, осип,болки во мускулите и зглобовите, главоболка и мачнина
Иако поголемиот дел од луѓето се опоравуваат во рок од една недела, некои имаат долготрајни болки во зглобовите што може да траат со месеци или дури со години.
Нема специфичен лек или широко достапна вакцина, но според СЗО, смртни случаи се ретки.
Вирусот не се пренесува од човек на човек, туку преку каснување од инфициран комарец, кој потоа може да го пренесе на друг човек.
Како Кина ја контролира епидемијата?
Властите во Гуангдонг најавија “решителни и енергични мерки” за спречување на понатамошно ширење на вирусот.
Главниот фокус е на отстранување на легла за комарци, што според СЗО е најефикасниот метод за контрола.
Граѓаните се повикани да отстранат застојана вода во нивните домови, бидејќи тоа се идеални места за размножување на комарци – како на пример: саксии, лежишта за вода од апарати, флаширана вода…
Непочитување на мерките може да резултира со казна до 10.000 јуани (~1.200 евра).
Во Фошан, мерките отидоа уште подалеку – илјадници риби што јадат ларви од комарци се пуштени во езера и водни површини, а дронови летаат низ градот за да откријат скриени извори на вода.
Европа исто така се соочува со вируси од комарци
До 30 јули, две европски земји пријавиле случаи на чикунгуња:
- Франција – 49 случаи
- Италија – 2 случаи
(според Европскиот центар за превенција и контрола на болести – ECDC)
Во Италија, 93-годишна жена почина од вирусот Западен Нил, што исто така се пренесува преку комарци, во регионот Лацио. Тоа го покачи бројот на починати во Италија на 10 оваа година.
Во последната недела од јули се пријавени 57 нови случаи, а невроинвазивната форма на болеста е особено смртоносна. Стапката на смртност е 20%, во споредба со 14% во 2024 година.
ECDC известува за случаи на вирусот Западен Нил во: Италија, Грција, Романија, Бугарија и Франција.
Најмногу случаи има во италијанската провинција Латина, каде се пријавени 43 инфекции.
