Кинеската агенција за летови во вселената со екипаж China Manned Space Agency (CMSA) објави дека во 2026 година планира две мисии со екипаж и една товарна мисија за снабдување.
Агенцијата потврди и дека кинеската лунарна програма напредува кон целта – прво слетување на Месечината пред 2030 година, пренесува Global Times.
Пакистански астронаут на кинеската станица
Еден пакистански астронаут треба да реализира краткорочна мисија на кинеската вселенска станица како специјалист за товар, при што ќе спроведува научни експерименти за Пакистан.
Минатата година Кина и Пакистан потпишаа договор за селекција и обука на астронаути, а ова ќе биде прва конкретна реализација на таа соработка.
Подготовки за Месечината
CMSA соопшти дека програмата за човечки вселенски летови целосно ги спроведува насоките од 15-от петгодишен план на Кина, со фокус на развој на вселенската станица и подготовка на мисии за слетување на Месечината.
Меѓу клучните проекти што напредуваат се ракетата-носач „Долг марш 10“, вселенското летало со екипаж „Менгџоу“ и лунарниот лендер „Ланјуе“.
Од почетокот на програмата, на кинеската вселенска станица се реализирани 267 научно-истражувачки и применети проекти во областите на вселенската медицина, микрогравитацијата, физиката и новите вселенски технологии.
Агенцијата нагласува дека продолжува да ја унапредува меѓународната соработка во областа на вселенските летови, со што Кина дополнително ги зајакнува своите капацитети во истражувањето на вселената.
