Летачките такси-возила ќе станат изводлив начин на транспорт во Кина во наредните три до пет години, тврди висок функционер на компанијата Ehang, која произведува автономни воздушни возила (AAV), јавува CNBC, а пренесува NIN.
Оваа прогноза ја изнесе потпретседателот на Ehang, Хе Тјашинг, само неколку дена откако компанијата, заедно со својот партнер во заедничкото вложување – Hefei Heji Aviation – стана прва што добила сертификат од Кинеската цивилна управа за авијација за „цивилни, човеконесечки беспилотни воздушни возила“.
Ehang соопшти дека овој сертификат го отвора патот за комерцијална употреба на нивните летала, дозволувајќи платени услуги за превоз на луѓе, како и други апликации на ниска висина кои компанијата ги развива.
Нивните автономни воздушни возила ќе се користат за туризам, а патниците ќе можат да патуваат по одредени рути во Гуангџоу и Хефеи до крајот на јуни, потврди Хе во интервју за CNBC.
Компанијата ќе го истражува пазарот на летачки такси-услуги паралелно со развојот на туристичките програми, а Хе додаде дека Хефеи и Шенжен ќе бидат меѓу првите градови кои ќе добијат ваква услуга.
Моделот на Ehang, EH216-S, кој доби сертификат, е целосно електрично, беспилотно воздушно возило со две седишта и 16 пропелери. Максималната брзина е 130 километри на час, а дометот 30 километри, според официјалната страница на компанијата.
Се очекува компанијата во текот на оваа и наредната година да добие дополнителни сертификати за работа во други градови. Во втората фаза од туристичките операции се вклучени градовите Џухе, Шенжен, Тајуан, Вукси, Венжоу и Вухан.
Хе одби да открие колкава ќе биде цената по возење во Хефеи и Гуангџоу, но верува дека ќе биде доволно достапна за да ги поттикне луѓето да пробаат беспилотно летало, бидејќи „искуството ќе биде слично на возење автомобил“. Возењата ќе траат од 3 до 10 минути, и нема да биде потребно носење шлем или падобран.
На прашање за глобалните пазари, Хе рече дека странски партнери активно стапиле во контакт со компанијата по добивањето на сертификатот, и дека Ehang очекува проширување на меѓународниот пазар во наредните години.
Според технолошки аналитичари, фактот што Кина дозволи комерцијална употреба на патнички AAV укажува на иновативниот пристап на земјата и нејзиното водство во областа на мобилноста.
Ден Ајвс, глобален директор за истражување на технологии во Wedbush Securities, вели:
„Кина веќе се етаблира како глобален лидер во електрични возила и автономно возење. Летачките такси-возила се следната граница во автомобилската и технолошката индустрија.“
Пекинг првпат објави правила за летови на беспилотни воздушни возила во јуни 2023 година, додека САД сè уште немаат такви. Американската FAA (Федерална управа за авијација) објави само општи правила за електрични летала со вертикално полетување и слетување (eVTOL).
Ту Ле, основач на Sino Auto Insight, за CNBC изјави дека САД заостануваат зад Кина и дури зад ЕУ во секторот eVTOL, што го припишува на претерана регулатива, влијание на лобисти од конкурентни индустрии или едноставно – политика.
Во меѓувреме, Кина ја поддржува eVTOL технологијата како дел од својата стратегија за „економија на ниска надморска висина“ – нов приоритет во државната политика.
Покрај летачки такси и други eVTOL летала, таа економија вклучува и беспилотни дронови за достава и хеликоптерски шатли. Поимот „економија на ниска надморска висина“ неодамна беше вклучен и во годишниот владин извештај за 2025 година, со ветување дека ќе се промовира нејзиниот развој.
Според Ајвс, глобалниот пазар за електрични летала со вертикално полетување и слетување би можел да достигне вредност од 30 милијарди долари во следната деценија.
