Умеров, кој престојува во Соединетите Американски Држави каде што учествува во преговорите, преку апликацијата Телеграм соопшти дека во разговорите ќе бидат вклучени и европските партнери на Киев.
„Конструктивно сме насочени. Веќе одржавме прелиминарни консултации со нашите европски колеги и се подготвуваме за понатамошни разговори со американската страна“, наведе Умеров, додавајќи дека безбедноста на Украина мора да биде сигурно и долгорочно гарантирана.
Администрацијата на американскиот претседател Доналд Трамп се обидува да стави крај на речиси четиригодишната војна. Претходно оваа недела, пратеникот на Белата куќа Стив Виткоф и зетот на Трамп, Џаред Кушнер, во Берлин разговарале со украински и европски претставници.
Украинскиот претседател Володимир Зеленски изјави дека Украина и САД постигнале договор за неколку документи, меѓу кои и мировна рамка со 20 точки, безбедносни гаранции и план за обнова на Украина. Тој, сепак, нагласи дека сè уште не е постигнат договор за усогласени конечни предлози и дека територијалните прашања остануваат нерешени.
Рускиот претседател Владимир Путин денеска не понуди компромис околу условите за завршување на војната во Украина, истакнувајќи дека следниот чекор треба да го направат Украина и Европа. Според претставник на Белата куќа, Виткоф и Кушнер планираат за време на викендот да се сретнат со руско претставништво во Мајами.
Извор: Index.hr
