Трн: Два пати си дел од каталогот White ravens. Што е она според тебе што ги задоволува критериумите на овој каталог?
Кате: Пресреќна сум што сме по втор пат дел од The White Ravens каталогот и се надевам нема да е последен 😊. Според мене, добра книга е онаа што е во целокупност комплетна, концептот и темата на книгата, усогласеноста на текстот со илустрацијата, изработката на книгата и секогаш е плус доколку книгата има некаква интерактивност и иновативност.
Трн: Дали твојата детска визуелизација ти помага во илустрациите што денес ги црташ, како си ги замислуваше ликовите што денес ги оживуваш и им даваш карактер?
Кате: Не се сеќавам како сум ги доживувала ликовите, но добро се сеќавам дека сликовници кои имаа мали илустрации (вињети) а повеќе текст или илустрации што не ми се допаѓаа, не сакав да ги читам. Така е и денес, секогаш на полица во книжарница се фаќам за тие книги што имаат добра илустрација, корица или добра изработка. Така, и јас се трудам книгите кои ги работам да бидат такви како што јас би ги избрала од полица.
Трн: Експресионизмот може да пренесе широк спектар на емоции. Дали Тим Бартон те инспирира за твојот стил на цртање и илустрација?
Кате: Ме воодушевува неговиот пристап на естетика, даркерски, но и хумористичен стил кој е често прифатлив и кај деца. Мрачен и spooky стил е она што сакам повеќе да го работам и се надевам дека еден ден таквата естетика ќе се нормализира и кај нас во детската литература.
Трн: Графички дизајнер како професија се чини дека во последниве неколку години има голема експанзија и многумина од младите се запишуваат на курсеви кои ги завршуваат за 5-6 месеци со надеж дека ќе најдат работа. Што мислиш ти за ова? Се наоѓа ли навистина брзо работа со тој повик?
Кате: Студирав 5 години на факултет графички дизајн и секако не можам да кажам дека за 5-6 месеци се станува графички дизајнер. Но се разбира, и да се 5-6 месеци или 5-6 години на студии, тоа е чекорот што треба да се направи и секако, мора и самиот дизајнер да сака да знае повеќе, упорно да работи, да експериментира и да сака да изгради свој визуелен стил. Верувам дека може да се најде работа, но со самото тоа што сега има се повеќе и повеќе дизајнери, така станува и по тешко да се издвоиш од другите за да го добиеш саканото работно место/работен проект.
Трн: Дали треба да имаш определен талент за да почнеш да се занимаваш со оваа работа или барем чувство за естетика? Треба ли да имаат некаков филтер центриве за неформално образование? Не може секој кој ќе посака да стане дизајнер, нели ?
Кате: Накратко, секој може да стане дизајнер, но не секој може да стане добар дизајнер. За да почнеш да се занимаваш со дизајн, треба само да сакаш и да бидеш спремен на одговорноста и предизвиците кои те чекаат. Со упорна работа и искуство, верувам дека самиот ќе знаеш што тебе ти одговара да креираш понатака и во кој правец во дизајнот ќе сакаш повеќе да се надградуваш. Според мене, да, јас сакам дизајни кои се естетски добри, и сметам дека тоа е битна особина што треба да ја поседува еден дизајнер.
Трн: Повеќе е уметност или повеќе е занает?
Кате: Графичкиот дизајн е применета уметност, така да, би рекла и двете.
Трн: Како ти кликнуваат дизајнерски решенија? Истражуваш ли на темата претходно, одиш кон основите? Дали едноставното решение е секогаш најидеалното решение?
Кате: Едноставното, но функционално решение секогаш е најтешко. Секогаш истражувам. Буквално 90% од проектот кој треба да го сработам е во истражување, creative thinking, скицирање и на крај за мене најлесниот дел е да го изработам финалното решение.
Трн: Омилено животно на многу креативци е мачка, мачките се познати по тоа што на уметниците им даваат фокус и креација во работењето, имаш ли ти можеби некој омилен предмет, мантра или нешто друго кое ти помага во процесот на креација?
Кате: Иако многу сакам мачки и кучиња и често ги користам во моите илустрации, за жал сеуште немам домашно милениче за да може да биде со мене при процесот на работа. Мојата мантра се вика „5 до 12”. Креативноста и брзината на работа се надминуваат самите себеси кога се ближи дедлајнот за даден проект 😊
Трн: Дали во сите проекти црташ по нешто што ти е омилено, како печурки, цветче, камен, пеперутка…?
Кате: Секако, во 99% од проектите на кои имам илустрации цртам месечина ѕвезди и дрвја.
