Шумските пожари во Грција, Албанија, Шпанија, Португалија и Италија предизвикаа голема материјална штета. Најмалку две лица загинаа, а илјадници се соочуваат со евакуација, пренесува Euronews.
Пожарите низ јужна Европа продолжуваат да предизвикуваат масовна штета и ја загрозуваат безбедноста на илјадници луѓе, додека топлотен бран го зафаќа дел од континентот.
Во Грција, пожарникарите се борат да ги стават под контрола шумските пожари на периферијата на третиот по големина град во земјата – Патра. Седум големи пожари предизвикаа повеќе евакуации, уништувајќи домови и бизниси. Локалната служба за цивилна заштита испрати повеќе од 20 аларми преку мобилен телефон поради пожарот.
Силните ветрови ги отежнуваа напорите за гаснење на пожарите на блиските острови, каде властите беа во готовност да евакуираат туристички одморалишта. Пожари избувнаа и во западниот дел од копнена Грција, како и на островот Хиос.
Во Албанија, шумските пожари зафатија шуми, куќи и предизвикаа најмалку една жртва.
Неколку села беа евакуирани додека пожарите продолжуваат да зафаќаат делови од земјата. Според властите, околу триесет пожари претставуваат закана за населението и горат шумски површини.
Според извештаи, 80-годишен маж загинал во пожарот во областа Грамш, околу 80 километри оддалечена од главниот град Тирана.
Околу 1.000 пожарникари, припадници на армијата и локален персонал беа мобилизирани за да се борат со огнената стихија, информираа албанските власти.
Шумски пожари на Иберискиот Полуостров
Во Шпанија, илјадници луѓе се соочуваат со наредби за евакуација додека пожарите беснеат низ Иберија.
Пожарникарите во голема мера го ставија под контрола пожарот што избувна надвор од Мадрид во понеделникот вечерта. Тој пожар предизвика смрт на едно лице, евакуација на десетици луѓе и зафати над 10 квадратни километри земјиште.
Неколку лица беа уапсени од шпанските власти како осомничени за предизвикување на пожарите.
Топлотниот бран во регионот се очекува да достигне и до 44 степени Целзиусови во некои области.
Во Португалија, службите за итни случаи се борат со серија шумски пожари додека земјата се соочува со уште еден топлотен бран.
Властите соопштија дека три големи пожари што започнале за време на викендот се особено загрижувачки.
Околу 2.000 пожарникари се на терен за да ги стават пожарите под контрола, од кои повеќе од 700 работат на гаснење на пожарот во Транкозо.
Алармот за екстремни временски услови беше продолжен до петок низ цела копнена Португалија.
Италијанските пожарникари се справуваат со шумски пожар на планината Везув, каде што пламените јазици беснеат од петокот.
Авионите стотици пати истураа вода над пламените за да го спречат ширењето на пожарот.
Според Институтот „Коперникус“ на ЕУ, Европа се загрева побрзо од кој било друг континент, а шумските пожари имаат масовно влијание врз континентот ова лето.
