Разорни поплави ја погодија Азија, при што стотици луѓе го загубија животот, а милиони се засегнати. Во Индонезија, спасувачките тимови водат трка со времето во потрагата по најмалку 400 исчезнати лица, за кои се стравува дека се затрупани во свлечишта по циклонските дождови што ја зафатија областа пред речиси една седмица.
Властите потврдија дека само на островот Суматра бројот на загинати надминал 440, додека бурата и обилните дождови што го погодија Тајланд, Малезија, Филипини и Шри Ланка овој месец однесоа повеќе од 900 животи.
Тропски циклон предизвика масовно уништување
Индонезија беше погодена од исклучително редок тропски циклон Сенјар, кој предизвика катастрофални свлечишта, уништи домови и потопи илјадници објекти. Според Националната агенција за управување со катастрофи, голем број луѓе се исчезнати во провинциите Ачех, Северна Суматра и Западна Суматра. Помошта пристигнува по воздух и море, но некои села сè уште се целосно отсечени, а се појавиле и извештаи за кражби на храна и вода, пренесува BBC.
Доставата на хуманитарна помош е исклучително бавна во најтешко погодените подрачја – градот Сиболга и округот Централен Тапанули. Поради обидите за провали во продавници, регионалната полиција е распоредена да одржи ред.
Зошто разурнувањето е толку големо?
Климатологот Ерма Јулихастин објаснува дека уништувањето е последица на огромен и долготраен систем на грмотевични бури. Просечната месечна количина врнежи во погодените региони е околу 150 мм, додека на некои локации таа количина паднала во само еден ден.
„Сѐ над 100 мм за еден ден е екстремно, а 200 мм е катастрофално“, изјави таа.
На 23 ноември на западниот брег на Суматра паднале 160 мм дожд, а ден потоа дури 226 мм.
Поплави ширум регионот
Југоисточна Азија се соочува со едни од најтешките поплави во историјата. Циклонот Сенјар предизвика силни дождови и свлечишта во Тајланд и Малезија, каде загинаа околу 170 луѓе. Во Виетнам, приближувањето на тропската бура Кото однесе уште три животи, а претходните дождови веќе усмртија најмалку 90 лица.
Тифунот Калмаеги, кој ги погоди Филипините на почетокот од ноември, однесе речиси 300 животи. Во Јужна Азија, циклонот Дитвах ја погоди Шри Ланка, каде загинаа повеќе од 330 луѓе. Претседателот Анура Кумара Дисанајаке ја опиша ситуацијата како „најголема природна катастрофа“ во историјата на земјата
„Беше како цунами“ – сведоштва од најпогодените
Во провинцијата Ачех, каде бројот на жртви достигна 96, а 75 лица се уште се водат како исчезнати, ситуацијата е критична. Во многу евакуациски кампови залихите се при крај, а некои жители пријавуваат дека децата пијат собрана дождовница.
Арини Амалија од Пиди Џаја раскажува дека едвај избегала со својата баба. Кога се вратила да ги земе работите, куќата веќе била целосно уништена. Во домот по повлекувањето на водата останал метар кал.
„Ова е најлошото што баба ми го доживеала. Затоа сум трауматизирана – беше како цунами“, вели таа.
Пристапот до погодените региони – речиси невозможен
Поради свлечишта и урнати мостови, главните патишта се блокирани и многу области се целосно изолирани. Новинарските екипи летаат до Пеканбару и оттаму патуваат со часови кон запад, но пристапот до најкритичните зони и понатаму е многу ограничен. На многу места може да се стигне само со моторцикли.
Претседателот на Индонезија ги посети погодените
Претседателот Прабово Субианто ги посети регионите најтешко погодени од поплавите, вклучувајќи го округот Централен Тапанули. Во Северна Суматра повеќе од 200 лица загинаа, а уште 200 се водат како исчезнати.
Харио Вирауан од BBC ја сподели приказната за семејството на неговата сопруга кое живее во Сиболга. Контактот со нив го изгубиле на 25 ноември, кога водата наеднаш навлегла во куќата.
Неговата шура и ташта се обиделе да избегаат со мотор, но тој се расипал во вода до колена. Пешачеле два километра, туркајќи го моторот до куќа на роднина. Таму ги фатила паника поради веста дека ќе се отвори брана од блиската хидроелектрана.
Ноќта ја поминале на импровизирана платформа направена од маси. Дури следното утро, кога водата почнала да се повлекува, успеале да стигнат на безбедно.
