Катар и Украина потпишаа договор за одбранбена соработка кој ќе овозможи размена на експертиза и технологии во справување со ракетни и дрон закани.
Договорот беше постигнат за време на средбата меѓу катарскиот емир шеик Тамим бин Хамад Ал Тани и украинскиот претседател Володимир Зеленски во Доха.
Станува збор за дел од дипломатската турнеја на Зеленски во земјите од Персискиот Залив, каде претходно беа постигнати договори и со Саудиска Арабија и Обединетите Арапски Емирати.
Според катарското Министерство за одбрана, двете страни разговарале за актуелните безбедносни предизвици и можностите за продлабочување на соработката.
Договорот го потпишаа началникот на украинските вооружени сили, Андриј Хнатов, и началникот на штабот на катарската армија, Џасим бин Мохамед Ал-Манаи.
Соработката ќе опфати технолошки развој, инвестиции во одбранбени системи и размена на искуства, особено во контекст на зголемената употреба на дронови во современите конфликти.
Украина, која стекна значително искуство во одбраната од беспилотни летала, настојува да го искористи тоа знаење за соработка со земјите од Заливот, кои во последниот период се соочуваат со слични закани.
Истовремено, Киев бара поддршка од економски моќни партнери, во услови кога глобалното внимание се пренасочува кон други кризни жаришта.
