На 30 и 31 август, следат два дена полни со дружење, музика и чиста енергија на брегот на Преспанско Езеро со акција за чистење на Преспа. Бесплатен кампинг простор, музичка програма и еко акција се дел од настаните кои се предвидени од овој камп. кој ќе биде поинакво доживување во Преспа, каде што се сретнуваат авантурата, забавата и љубовата кон природата.
Плажа на автокамп Крани, Летен шанк „Сончев брег“ е локацијата на која ќе се кампува. Организаторите обезбедуваат: бесплатен простор за кампување, вечерна забава со музички изведувачи; промо камп пакети за пријавените кампери; пакет за освежување за добредојде, тоалети со отворен туш, паркинг простор за возила на самата локација; опрема за еко акција.
Обврска на камперите е да понесат сопствена камп опрема, соодветна облека и други додатоци за кампување и одлично расположение и љубов кон природата. Во автокампот „Крани“ има колонијална продавница и ресторан како алтернатива за оброк или други потреби. Активностите ќе се одржуваат на летниот шанк „Сончев брег“, кадешто ќе се служат пијалоци и храна по многу пристапни цени, иако камперите можат да си понесат и сопствена храна.
Камп фест Преспа 2025 го организираат Еко герила Преспа и Институтот за комуникациски студии како дел од кампањата за управување со отпад „Преспа? Разбуди се за чиста средина“, која е поддржана од Европската унија.
