Неколку експлозии се слушнале во Париз непосредно пред да избие пожар во камионет кој се наоѓал во близина на резиденцијата на францускиот премиер во заминување, Себастијан Лекорни — само еден ден по неговата оставка.
Според извештаите на Le Parisien, сведоци слушнале три експлозии во близина на хотелот Матиньон, каде што Лекорни требало да одржи состаноци по поднесената оставка. На лице место се наоѓале и други високи политичари, вклучувајќи ги Габриел Атал и Едуар Филип.
На видеа и фотографии објавени на социјалните мрежи се гледа како камионетот гори, додека итните служби се обидуваат да го изгаснат пожарот. Пожарот, според локалните медиуми, е ограничен само на возилото и не се проширил на околните згради.
Сè уште не е познато што го предизвикало пожарот или експлозиите. Возилото, според достапните податоци, припаѓа на компанија за јавна расвета.
Улицата Rue de Varenne е целосно блокирана, а безбедносните служби се на терен.
Овој инцидент доаѓа во време на длабока политичка криза во Франција. Вчера, Лекорни поднесе оставка само 27 дена по неговото именување, откако не успеа да формира стабилна влада. Веднаш по оставката изјави:
„Веќе не беа исполнети условите да ги извршувам моите должности и да ѝ дозволам на владата да се појави пред Националното собрание.“
Денес, Лекорни треба да се обрати пред Народното собрание, но не е јасно дали инцидентот ќе влијае врз неговото појавување или ќе доведе до дополнителни безбедносни мерки.
