Корисници на платформата брзо забележаа дека меѓу нив има и про-Трамп и анти-Трамп профили со милионски прегледи, чии локации – според податоците на „X“ – се во Индија, Нигерија, Кенија или дури Иран. Профилите, кои често имаат сини беџови, можат да заработуваат од интеракциите што ги генерираат.
Податоците за локација – „99% прецизни“, тврди „X“
Новата ознака, поставена во делот „About this account“, покажува географска локација, но со предупредување дека може да биде под влијание на патувања или VPN. Никита Биер, шеф на производи во „X“, тврди дека податоците се речиси целосно точни.
BBC Verify не можеше независно да ги потврди информациите, но анализата откри големи несогласувања меѓу прикажаната локација и претставувањето на профилите.
Примери: про-Трамп профил во Индија, „Иванка“ од Нигерија
Трамп во саботата на Truth Social сподели објава од профилот @TRUMP_ARMY_, кој славеше одлука на Врховниот суд. Но новата ознака на „X“ покажува дека профилот е базиран во Индија. Исто така, бил преименуван четири пати од 2022 година.
Друг профил – @IvankaNews_, фан-страница за Иванка Трамп со повеќе од еден милион следбеници – се покажал дека е регистриран во Нигерија. Профилот 11 пати го сменил корисничкото име од 2010 година. По откритието, профилот објави дека „искрено го поддржува Трамп и однадвор“, а потоа беше суспендиран од непознати причини.
Анти-Трамп профил од Кенија
BBC Verify идентификува и профили што агресивно објавувале против Трамп, а за кои „X“ покажува дека се лоцирани во Кенија. Еден од нив, со 52.000 следбеници, се претставувал како „горд демократ“ и „ловец на МАГА“, но профилот беше избришан по откритието.
Лажни профили и во шкотската политика
Платформата откри и десетици профили кои се претставувале како поддржувачи на независноста на Шкотска, но според техничките податоци пристапувале до „X“ преку Android апликација од Иран, со локација означена во Холандија – веројатно со VPN.
Ниту еден од сопствениците не одговорил на обидите на BBC за контакт.
Профили со сини беџови – мотив е заработка
Повеќето од овие профили имаат син беџ, што значи дека плаќаат претплата на „X Premium“ и можат да заработуваат од својот ангажман. За монетизација мораат да исполнат услови, како над пет милиони импресии за три месеци.
Алексиос Манцарлис од Cornell Tech смета дека токму сините беџови го зголемуваат проблемот:
„Платените беџови се само извор на приходи за X – не систем за вистинска верификација.“
Тој додава дека други функции, како „community notes“, сепак ја зголемуваат транспарентноста.
Мешани мотиви: политики, пропаганда, пари
Експертите велат дека профилите може да се водат од троловски фарми, државни структури или поединци што сакаат да заработат пари.
Дарен Линвил од Clemson University:
„Не е само политика – дел од овие профили само се обидуваат да заработат, преправајќи се дека се Американци.“
Но, според него, „лошите актери“ брзо ќе се прилагодат, вклучително и со користење понапредни VPN или методи за да симулираат локација во САД.
Извор: BBC
