Николас Мадуро верува дека неговиот претходник и политички ментор, починатиот Уго Чавез, му се јавил во форма на птичка. Тој исто така смета дека предвременото прославување на Божиќ, со претседателски декрет два месеци порано, го подига духот на Венецуелците. Мадуровите одлуки и изјави се толку ексцентрични што добија свој термин: „мадурадас“. Сепак, со години тој покажува дека потценувањето е голема грешка за неговите критичари, пишува CNN.
Исмевањето на Мадуро постоело и пред 2013 година, кога ја презел претседателската функција. Тогаш бил еден од неколкуте можни наследници на болниот Чавез, иако веќе бил министер за надворешни работи и потпретседател. Чавез, разболен од рак, на почетокот на декември 2012 година го назначи Мадуро за свој наследник.
„Синот на Чавез“ ја инагурираше владата и со години пркосеше на критиките за изборниот систем, протестите, санкциите, наредбите за апсење, заканите за бунт и меѓународната изолација.
Денес, Мадуро е најдолговечен претседател во Латинска Америка, со 12 години и седум месеци на власт. Тој успеа да преживее, додека Венецуела изгуби милиони жители, 72% од економијата, демократскиот легитимитет пред светот и многу клучни меѓународни сојузници.
Мадуро вели дека се соочува со „егзистенцијална ситуација“, додека се поставува прашањето дали повторно ќе успее да пркоси на прогнозите и да преживее во услови на воен и дипломатски притисок од американскиот претседател Доналд Трамп.
„Синот на Чавез“
„Ако се случи нешто неочекувано што ќе ме спречи да продолжам да бидам претседател, моето цврсто мислење е дека треба да го изберете Николас Мадуро“, рекол Чавез во декември 2012 година, само неколку часа пред да отпатува на Куба на лекување.
Мадуро вели дека никогаш не сонувал да биде претседател, но Чавез го подготвувал за тоа.
Роден како син на политички активист, Мадуро рано влегува во политика, се приклучува на Социјалистичката лига и работи како возач на автобус во Каракас. Тој станува синдикален лидер и преку таа позиција се запознава со својата иднина: жена му Цилија Флорес и самиот Чавез.
Флорес станува неговата партнерка и клучна фигура во политиката, додека Мадуро станува „син на Чавез“.
Мистеријата на кубанската поддршка
Мадуро ја гради својата моќ со поддршка од Куба. Неговата врска со Фидел и Раул Кастро, а потоа и со Мигел Дијаз-Канел, е клучна за опстанокот на неговиот режим. Кубанската разузнавачка служба, според поранешни официјални лица на администрацијата на Трамп, помогнала да се спречи опозицискиот бунт во 2019 година.
Циклус кој се повторува
Мадуро, иако го добил благословот на Чавез, на изборите во април 2013 победил тесно против опозицискиот лидер Енрике Каприлес. Опозицијата не ги признала резултатите, а Мадуро вовел модел кој ја дефинира неговата владавина: спорни избори, протести, репресија и расподелба на моќта меѓу лојалните.
На меѓународната сцена, Мадуро се потпира на поддршка од Кина, Русија и Иран.
Високата цена на преживување
За Венецуелците, цената е огромна: загубени животи, егзил и сиромаштија. Од 2017 година, извештаите на ОН и Меѓународниот кривичен суд документираат масовни кршења на човековите права, произволни апсења, сексуално насилство, мачење и егзекуции.
Економијата е на само 28% од нивото во 2013 година, а нафтената индустрија е во колапс. Американските санкции се користат како оправдување, но економскиот колапс започнал уште пред нивното воведување.
Масовниот егзодус, со околу 8 милиони Венецуелци во странство, е една од најголемите миграциски кризи во светот.
Тајната на опстанокот
Мадуро гради сложена рамнотежа на моќ: армијата и стари чавистички лидери, како и паравоени групи „коективос“, се клучни за неговата контрола. Тој распоредува моќ, пари и одговорности за да го обезбеди сопствениот опстанок, додека многумина во неговата структура се предмет на меѓународни истраги.
Американските санкции и притисоци не успеваат да го симнат од власт. Сега се соочува со најголема американска поморска и воздушна блокада во Карибите во последните децении. Мадуро повторно пркоси на изгледите. Дали повторно ќе успее?
