Резултатите покажаа дека исхраната базирана на растенија го намалува ризикот од развој на сериозни болести. Ова не значи појава на само една болест, туку неколку истовремено.
Мултиморбидитетот е сè почест во светот и најмногу ги погодува луѓето над 60 години. Лекарите го користат овој термин за да ја опишат ситуацијата кога едно лице има две или повеќе хронични заболувања истовремено. Може да биде комбинација од дијабетес и срцеви проблеми, но и појава на рак заедно со висок крвен притисок.
Според податоците од голема британска и европска студија, луѓето кои јаделе повеќе храна базирана на растенија имале до 32 проценти помал ризик од развој на комбинација од рак и срцеви заболувања, заболувања на крвните садови или дијабетес. Истражувачите нагласуваат дека не е потребно целосно да се елиминира месото. Доволно е храната од растителна основа да биде почест избор на чинијата и тоа веќе носи значителна заштита.
Експертите препорачуваат да се вклучат повеќе овошје и зеленчук во исхраната. Производите од цело зрно како што се овес, ‘рж или кафеав ориз се особено важни. Мешунките како што се грав, леќа и наут исто така имаат многу корисен ефект врз здравјето. Добро е да се посегне по здрави растителни алтернативи кои можат да заменат некои месни производи.
Во исто време, внесот на месо и преработени месни производи треба да се намали бидејќи нивната прекумерна употреба го зголемува ризикот од хронични заболувања.
Професорот Карл-Хајнц Вагнер од Универзитетот во Виена нè потсетува дека овој начин на исхрана не само што го штити нашето тело, туку и нашата планета. Тој нагласува дека исхраната базирана на растенија ја намалува емисијата на штетни гасови и потребата од големи земјоделски површини.
