Натан „Нирест“ Грин, човекот што го научил Џек Даниел на уметноста на дестилација на виски, останал непознат повеќе од 150 години.
Џек Даниелс е еден од најзначајните американски брендови и еден од најпознатите жестоки пијалаци во светот. Сепак, додека вискито и неговиот основач станаа препознатливи имиња во американската традиција, личноста која можеби имала најголем придонес за неговиот успех – поробениот Натан „Нирест“ Грин – останала во сенка.
Истражувањата покажуваат дека улогата на поробените лица во раното производство на виски во Америка надминувала физичка работа како собирање жито и градење буриња. Дестилацијата била макотрпна и барала вештина, па некои сопственици на плантажи – вклучувајќи ги Џорџ Вашингтон и Ендру Џексон – користеле робови работници за управување со дестилерии.
Според американскиот писател Фред Миник, автор на книгата „Bourbon: The Rise, Fall, and Rebirth of an American Whiskey“, на аукциите често се наведувале робови обучени за дестилатори. Многу од нив претходно работеле на плантажи со шеќерна трска во Карибите, каде што стекнале искуство во дестилација на рум од меласа. Овие вештини ги правеле вредни на пазарот. Но, генерално, документацијата за нивниот придонес е оскудна, бидејќи малкумина поробувачи ги бележеле нивните достигнувања.
Малку се знае за раните години на Грин, освен дека е роден во Мериленд во 1820 година. Не е познато дали е роден во ропство или подоцна бил поробен. Сигурно е дека до средината на 1800-тите, тој бил признат како исклучително вешт дестилатор во округот Линколн, Тенеси. Неговите сопственици, компанијата „Ландис и Грин“, често го изнајмувале за да ги користат неговите вештини.
Токму така го сретнал младиот Џаспер „Џек“ Даниел, кој околу 1850 година, како 7-годишно сираче, побарал работа на имотот на Ден Кол – проповедник, трговец и дестилер од Линчбург. Се сметало дека Кол го научил Џек Даниел да дестилира, но според биографијата „Наследството на Џек Даниел“ (1967), вистинскиот учител бил Грин, кого Кол го нарекол „најдобриот производител на виски што го познавам“.
Грин го вовел Даниел во техниката на филтрирање низ јаглен од шеќерен јавор – денес позната како „Процесот на округот Линколн“ – критичен чекор што го дава карактеристичниот вкус на тенеси вискито. Се смета дека процесот е инспириран од методи за прочистување вода и храна кои потекнуваат од Западна Африка.
Од роб до прв афроамерикански мајстор-дестилер
Со текот на времето, Даниел и Грин изградиле пријателство и заедно го усовршиле процесот. До почетокот на Граѓанската војна, Даниел веќе продавал виски во Линчбург и пошироко, а брендот станал сѐ попознат.
По еманципацијата, Даниел ја купил дестилеријата на Кол и ја преименувал по себе. Отворил нова дестилерија, каде што работеле и синовите на Грин – Луис, Ели и Џорџ – започнувајќи семејна традиција што трае преку седум генерации.
Задоцнето признание за Грин
Зошто, и покрај клучната улога на Грин, неговото име исчезнало од историјата на брендот?
Компанијата не водела детална документација, а првичните сопственици не сметале дека е важно да се признае улогата на афроамериканците во дестилацијата.
„Не мислам дека некогаш била свесна одлука да се изостави семејството Грин од приказната“, изјави Фил Епс, директор за глобален бренд во „Браун-Форман“, која го купи „Џек Даниелс“ во 1965 година.
Во 2016 година, по повод 150-годишнината од основањето, компанијата почна иницијатива за признавање на Нирест Грин. Но, Фон Вивер, истражувачка и претприемачка, забележала отсуство на неговото име за време на неколку тури низ дестилеријата. Почнала сопствено истражување и собрала над 10.000 документи што го потврдуваат – и го прошируваат – значењето на Грин.
Открила дека Грин не само што го научил Даниел, туку и работел заедно со него по еманципацијата, станувајќи – по номинација на Џек Даниел – првиот афроамерикански мајстор-дестилер во САД. „Нирест“ било име што веројатно го зел по ослободувањето.
Во 2017 година, благодарение на нејзиното истражување, компанијата официјално го признала Грин како прв главен дестилер на брендот, ставајќи го неговото име во срцето на приказната за Џек Даниелс – таму каде што отсекогаш му било местото.
Извор: History
