Опозициската СДСМ денеска обвини дека новата в.д. директорка на Националната агенција за Еразмус+, Ана Михајлов, била под сериозна истрага на Европската канцеларија за борба против измами – ОЛАФ. Според наводите, постоело основано сомневање за злоупотреба на над 2 милиони евра, протекување доверливи информации и незаконско управување со проекти преку надворешна фирма. Предметот бил испратен до домашното обвинителство, но обвинителен акт до денес нема.
ОЛАФ е независна истражна служба на Европската комисија која се занимава со измами и корупција со европски средства. Не суди и не обвинува, но дава конкретни препораки за враќање на пари, покренување судски постапки или дисциплински мерки.
Во Еразмус+ програмата, ОЛАФ често проверува дали има конфликти на интереси, манипулации со апликации или фиктивни трошоци. Таквите наоди може да резултираат со суспензија на плаќања, финансиски корекции или дури и исклучување на ризични субјекти од европските фондови.
Сега, клучното прашање е дали македонските институции добиле препораки од ОЛАФ и што направиле со нив. Без транспарентен одговор, ризикот е да се изгуби довербата во програмата и да следуваат финансиски санкции од Брисел – што на крајот ќе ги платат граѓаните.
Прочитајте повеќе на Рацин.мк
