Доколку некогаш сте посакале да јадете поголеми порции храна без страв од покачување на телесната тежина, концептот на волуметриска диета може да ве воодушеви. Таа се заснова на консумирање на големи количини нискокалорична, хранлива храна која дава чувство на ситост без прејадување. Клучот е во изборот на намирници што содржат многу вода и влакна, а малку калории.
„Храна со голем волумен и ниска енергетска густина е одличен избор за слабеење, бидејќи јадеме со очи, а големите порции го зголемуваат чувството на задоволство“, објаснува нутриционистката Александрија Харди за порталот Eating Well.
Во продолжение ви претставуваме седум намирници што можете да ги јадете во големи количини, а сепак успешно да слабеете.
Краставици
Краставиците имаат само 15 калории по шолја и, поради високата содржина на вода, се идеални како ужина. Со ова се согласува и нутриционистката Менди Енрајт, која советува: „Исечете ги на стапчиња, посипете ги со зачини и послужете ги со хумус или грчки јогурт. Можете да ги користите и наместо леб за брускети.“
Јагоди
Јагодите се одличен избор ако посакувате нешто слатко, а сакате да останете во рамките на калорискиот лимит. Имаат само 49 калории по шолја, богати се со влакна, вода и витамин Ц, и можат да помогнат при воспаленија и регулирање на нивото на холестерол. „Обидете се со нив исечени во салати, со овесни снегулки или замрзнати со малку цимет и шеќер“, препорачува Харди.
Печурки
Без разлика дали се сурови или термички обработени, печурките имаат низок калориски состав (околу 15 калории по шолја) и се богати со Б витамини и соединенија што можат да ги намалат воспаленијата, пишува Eating Well. „Шампињоните можете да ги користите наместо лепчиња, а суровите печурки како додаток на хумус или паштета од грав“, советува Енрајт.
Грејпфрут
Иако диетите со грејп од минатото беа претерани, ова овошје сè уште има вредност во балансирана исхрана. Има 69 калории по шолја, содржи 92% вода и 2.5 грама влакна. Енрајт препорачува: „Комбинирајте половина грејпфрут со варено јајце или свежо сирење и посипете со чиа семки за заситен појадок.“
Зеленчук
Зеленчук како кељ, спанаќ и рукола содржи многу малку калории, а е исклучително богат со витамини А, Ц, К, фолати и железо. На пример, една шолја кељ има само седум калории. Нутриционистката истакнува дека лиснатиот зеленчук може да се консумира „суров, како чипс или лесно пропржен со ручекот.“
Брокула
Брокулата е омилен зеленчук за многумина, а има само 31 калорија по шолја и изобилува со влакна и соединенија што можат да помогнат во борбата против воспаленија и некои видови рак. „Може да се вари, пече, приготвува во воздушна фритеза или да се иситни како ‘ориз’ и додаде во разни јадења“, заклучува Харди за Eating Well.
