Разговорот со децата за разводот не е лесна задача за родителите, а адвокатката за семејно право, Елис Буи, која се фокусира на благосостојбата на децата во текот на целиот процес, сподели неколку корисни совети.
Таа за „Psychology Today“ истакна шест корисни совети за родителите кои поминуваат низ развод и откри на што треба да внимаваат кога им ја пренесуваат вест на своите деца.
Однапред договорете разговор со вашиот сопружник
„Имањето груб план за тоа што ќе им кажете на вашите деца и како ќе одговорите на нивните прашања може да ви помогне да останете доследни во вашата порака“, тврди адвокатката.
Иако не можете да го предвидите секое прашање што ќе го постават вашите деца, дел од нив можете. Ако не сте сигурни како да одговорите на нешто, консултацијата со детски терапевт може да обезбеди дополнителни насоки.
Изберете безбедна средина за разговор
Освен ако не постои ризик од семејно насилство или непредвидливо однесување на брачниот другар поради алкохол, дрога или проблеми со менталното здравје, разговорот треба да се одржи во познат простор без присуство на други луѓе.
Целта е да им се овозможи на децата да се чувствуваат доволно безбедно за да ги изразат своите емоции.
Останете смирени, приспособете го разговорот на возраста на детето и бидете искрени
Адвокатката истакнува дека ако има прашања на кои сè уште немате одговори, можете да кажете нешто како: „Сè уште разработуваме некои детали, но штом ќе дознаеме повеќе, ќе ве известиме“. Тој одговор можеби нема целосно да ги задоволи, но важно е да бидете транспарентни.
Децата можат да изненадат со длабочината на нивните прашања или коментари за односот на нивните родители, бидејќи тие го набљудуваат целиот свој живот. Колку и да сте изненадени од некои коментари, не ги карајте, важно е да одржувате отворена комуникација. Ако некое прашање или коментар ви прави да се чувствувате непријатно, потврдете го тоа и кажете дека ви треба време да размислите за тоа и дека подоцна ќе разговарате за тоа.
Целта е да останете смирени, да давате одговори соодветни на возраста, дури и ако нивните прашања одразуваат зрелост над нивните години и да бидете искрени за она што го знаете и што сè уште не го знаете.
Дајте им на децата чувство на сигурност и стабилност
Иако сè уште не сте ги договориле сите детали, објаснете им на вашите деца дека мама и тато ќе им кажат сè штом имаат појасна слика за иднината. Но, она што никогаш нема да се промени е вашата љубов кон нив. Можеби звучи како клише, но децата од сите возрасти треба да го слушнат тоа, и не само еднаш. Повторувајте им го тоа природно во различни прилики.
Бидете позитивни, но не го игнорирајте нивното чувство на загуба
Децата не побараа ваш развод и веројатно ќе ја почувствуваат загубата, како и таа слика на детство што ја замислувале. Иако е важно да имате позитивен поглед на иднината, тоа не значи дека треба да ја игнорирате нивната тага.
И вие и вашиот сопружник можеби поминувате низ слични емоции, без разлика кој го иницирал разводот и поради која причина. Сигурно не би сакале некој да ги омаловажува вашите чувства, а истото важи и за вашите деца. Доколку почувствуваат дека родителите ги гледаат и разбираат, полесно ќе ги обработат и прифатат сопствените емоции.
Не дозволувајте разговорот да трае предолго
Избегнувајте застрашувачки коментари како „Можеби ќе треба да се преселиме во друг стан“ или изјави поврзани со пари како „Можеби повеќе нема да можеме да си дозволиме летен одмор“.
Иако таквите работи можеби се вистинити, децата немаат капацитет да ги обработат сите можни последици од разводот одеднаш.
Децата ги обработуваат информациите според нивната возраст и когнитивните способности, а на постарите деца не им требаат премногу информации одеднаш. Објаснете им дека ова е само прв во низата разговори и дека секогаш можат да дојдат кај вас со прашања.
