Социјалните придонеси можат да „изедат“ дури една третина од бруто-платата на вработените во Европа. Сепак, ако работите во Луксембург, имате среќа, најверојатно ја примате највисоката просечна саатница на целиот континент.
Големото Војводство, сместено во срцето на Европа, нуди просечна нето-плата од 49,7 евра на час, покажуваат најновите податоци на Еуростат. Веднаш зад Луксембург се најдоа нордиските земји. Исланд е на второто место со 47 евра, по што следуваат Норвешка (45,8 евра) и Данска (44,7 евра). На спротивната страна од табелата, со најниски просечни нето-саатници се соочуваат работниците во Латвија (12,9 евра), Романија (12,9 евра) и Бугарија (10,5 евра).
Источна Европа во силен налет: Каде платите растат најбрзо?
Иако нето-износите се сè уште пониски, вестите за Источна Европа не се целосно негативни. Во периодот меѓу 2021 и 2025 година, Бугарија забележа најголем скок на нето-платите од неверојатни 69,4%.
Полска исто така покажува исклучителни резултати со пораст на платите по даноци од 66%, а по неа следува Романија со раст од 61,3%. Работниците во Хрватска, Литванија и Унгарија исто така почувствувале значително подобрување, со зголемување на нето-примањата за повеќе од 50%.
Наспроти нив, платите останаа релативно стабилни во Норвешка (5,5%), Шведска (6,1%) и Италија (10,6%), кои пријавија најбавен раст во Европа. Клучните економии како Германија, Франција и Шпанија исто така забележаа раст под просекот на ЕУ, кој изнесува 20%.
Даночен товар: Каде државата зема најмногу?
Водењето бизнис во Европската Унија може да биде скапо за работодавците. За компании со најмалку 10 вработени, вкупниот трошок по работник изнесува околу 35 евра на час. Оваа сума се искачува на 38 евра кога се анализираат само земјите од Еврозоната.
Околу една четвртина од тие пари отпаѓаат на трошоци надвор од самата плата, како што се социјалните придонеси. Тука разликите се драстични. Работодавците во Франција (32%), Шведска (32%) и Словачка (29%) го поднесуваат највисокиот товар на нето-платите. Во Романија, Литванија и Малта, овој сооднос е речиси нула.
Интересен е случајот со Шпанија и Италија, каде даноците на трудот се повисоки од просекот на ЕУ, додека нето-саатниците на работниците остануваат под европскиот просек.
Вкупни трошоци за трудот: Кој плаќа најмногу?
Луксембург повторно е на врвот. Kога ќе се соберат платите и социјалните придонеси, работодавците таму плаќаат вкупно 57 евра на час. Тоа е за цели 5 евра повеќе од второпласираната Данска и речиси 10 евра повеќе од Холандија.
Јазот меѓу врвот и дното на ранг-листата е запрепастувачки. Во Бугарија, вкупниот трошок за труд е само 12 евра на час, што е најниско во ЕУ, додека во Унгарија изнесува нешто над 15 евра.
Генерално, трошоците за работен час на ниво на целата економија во ЕУ пораснале за 4,1% во споредба со 2024 година. Малта е единствената земја каде вкупните трошоци за труд се намалиле (-0,5%), додека најголем годишен пораст е забележан во Бугарија (+13,1%), Хрватска (+11,6%) и Словенија (+9,3%).
Извор: Euronews
