Нерaмнотежата во богатството претставува сериозен глобален проблем, а Европа не е исклучок. Најбогатите 1% од населението поседуваат најмалку 20% од вкупното богатство во речиси сите европски земји, а во многу од нив тој удел надминува и 25%, покажува анализа на Our World in Data.
Во многу европски држави денес живеат десетици милијардери. Меѓутоа, кои три европски гиганти предводат по бројот на милијардери – и колку точно имаат?
Според податоците на Форбс, во светот во 2025 година постојат повеќе од 3.000 милијардери со вкупно богатство од 16,1 трилиони долари (околу 13,7 трилиони евра). Но, концентрацијата на ова богатство е нерамномерна: САД, Кина и Индија заедно имаат повеќе од половина од сите милијардери и нивното комбинирано богатство.
Германија предводи во Европа
Најмногу милијардери во Европа има Германија – вкупно 171, со заедничко богатство од 676,4 милијарди евра. Најбогатиот Германец е Дитер Шварц, сопственик на ланците Лидл и Кауфланд, со проценето богатство од 35 милијарди евра, што го прави 37. најбогат човек во светот.
На второ место е Италија, со 74 милијардери и вкупно богатство од 289 милијарди евра. Најбогатиот Италијанец е Џовани Фереро, наследник на познатата компанија Фереро, со 32,6 милијарди евра, што го става на 41. место глобално.
Обединетото Кралство има 55 милијардери, со вкупно богатство од 203 милијарди евра. Најбогат е Мајкл Плaт со 16 милијарди евра, кој е на 106. место во светот.
Францускиот гигант Арно сè уште во светскиот врв
Франција има 52 милијардери, што ја става на четврто место во Европа. Најбогатиот Французин е Бернар Арно, шеф на луксузната империја LVMH (Louis Vuitton, Christian Dior, Sephora и други), со богатство од 152 милијарди евра, што го прави петти најбогат човек во светот – по тоа што во 2024 година беше на врвот на листата.
Арно често е во центарот на дискусии за воведување данок на богатство во Франција, мерка на која се силно противи.
Освен Германија, Италија, Обединетото Кралство и Франција, единствени европски држави со повеќе од 50 милијардери се Шведска (45) и Швајцарија (42).
Шпанија надвор од првите пет
Интересно, меѓу петте најголеми европски економии, Шпанија има најмалку милијардери – 34. Најбогатиот Шпанец е Амансио Ортега, основач на Индипекс и Зара, со богатство од 106 милијарди евра, што го прави деветти најбогат човек во светот.
Понатаму следуваат:
- Грција (16)
- Холандија (13)
- Ирска, Белгија и Чешка (по 11)
- Полска и Кипар (по 10)
- Австрија и Данска (по 9)
- Финска (7)
- Романија (6)
- Унгарија (4)
- Словачка и Бугарија (по 2)
- Португалија, Луксембург, Хрватска, Исланд и Албанија (по 1).
Најбогатиот Австриец е Марк Матешиц, наследник на Ред Бул, со 34,6 милијарди евра, што го поставува на 38. место во светот.
