Под мотото „Нашите во светот“, програмата е посветена на македонските режисери, актери и сценски автори кои во изминатите години успеале да се етаблираат на европски и регионални сцени, а сега повторно гостуваат на домашниот терен со свои нови проекти.
Организаторите најавуваат внимателно курирана селекција на претстави, концерти и изложби, со јасна цел: да се истакне интернационалниот опус на македонските уметници и да се слави нивниот придонес во современиот театарски јазик. „МОТ отсекогаш бил простор за ризик, нови идеи и пресек на различни театарски естетики. Ова издание е омаж на оние наши автори што ја носат македонската школа со себе на светските сцени“, изјавуваат од МКЦ.
Отворање со „Лимениот добош“ – македонска екипа на сцената на ЈДП Белград
Фестивалот ќе биде отворен со претставата „Лимени барабан“ („Лимениот добош“) во режија и адаптација на Васил Христов, поставена во Југословенско драмско позориште – Белград. Станува збор за сценска адаптација на ремек-делото на Гинтер Грас, со проширена македонска екипа во која учествуваат композиторот Никола Коџобашија и сценографот Константин Трпеновски.
Режисерски потписи од регионот – силна македонска продукција
Во рамките на главната програма ќе бидат прикажани и низа други претстави создадени од македонски автори ангажирани во регионални театри:
- „Куќа на граница“, режија Андреј Цветановски – Регионално позориште Нови Пазар (Србија)
- „Поручникот од Инишмор“, режија Ѓорѓи Ризески – Адриана театар, Урошевац (Косово)
- „Коштана“, режија Јана Маричиќ – Народно позориште Ниш (Србија)
- „Кучето се засмеа“, режија Ана Батева – „Спам театар“, Софија (Бугарија)
- „Граница“, режија Совран Нрецај – ОДА театар, Приштина (Косово)
- „Врба“, авторска работа на Искра Шукарова
- „Слугинки“, режија Агнес Нокшиќи
Во придружната програма, публиката ќе може да го доживее имерзивниот ВР-перформанс „Ехо од длабочината“ на Нина Николиќ и Борјан Стојков, како и концертите на групите „Звада“ и „Дис ис нот“ од Косово. Ќе биде отворена и изложба на Константин Трпеноски.
Затворање со „Мајка Храброст“
Фестивалот ќе заврши со претставата „Мајка храброст и нејзините деца“ во режија на Дејан Пројковски, во продукција на Новосадско позориште. Дел од авторскиот тим се Олга Панго, Валентин Светозарев и Сергеј Светозарев.
Плакатот за јубилејното издание го изработи Кристина Горовска.
Онлајн билети и поддршка
Целосната програма и распоредот се достапни на официјалната веб-страница mot.mk, каде што публиката може да купи онлајн билети. Фестивалот е поддржан од Министерството за култура и Град Скопје.
Организаторите напоменуваат дека се задржува правото на можни измени во програмата, за што јавноста ќе биде навремено информирана.
