За време на велигденските празници, автобусите на ЈСП ќе сообраќаат по неделен возен ред, што значи поредок превоз во град кој ионака се соочува со проблеми во јавниот транспорт.
Јавното сообраќајно претпријатие воведува празничен возен ред за периодот од петок до понеделник, при што автобусите ќе сообраќаат како во недела.
Ова за дел од граѓаните значи дополнително намалување на достапноста на превозот, иако потребата за движење низ градот не исчезнува – особено за оние што работат за празници или мораат да патуваат до болници, станици или семејства.
Според најавата, во сабота билетарниците и центрите за персонализација ќе работат редовно, додека во петок и недела дежурна ќе биде само билетарницата на Транспортен центар. Во понеделник тие нема да работат. Жичницата на Водно ќе функционира од петок до недела, а во понеделник ќе биде затворена.
Сепак, празничниот ред доаѓа во време кога системот веќе функционира со ограничени ресурси. Според податоци од Центарот за граѓански комуникации, од вкупно 341 автобус, дневно исправни се околу 185, а на линиите се пуштаат приближно 157.
Во исто време, просечната старост на возниот парк надминува 13 години, што дополнително влијае врз редовноста и квалитетот на превозот.
Патниците веќе подолго време се соочуваат со доцнења, нередовни линии и пренатрупани автобуси, а празничниот распоред за многумина значи уште пореток превоз во веќе оптоварен систем.
