Скопје ова лето ќе биде дел од светската музичка мапа: Joss Stone, една од најмоќните соул гласови на 21 век и глобална суперѕвезда, доаѓа во Македонија за својот прв open-air концерт, како прв голем настап на фестивалот Skopje Calling 2026. Концертот ќе се одржи на 21 јули, со почеток во 21 часот, на Стадионот на АРМ.
Од првиот момент кога се појави на сцената со револуционерниот албум The Soul Sessions (2003) — за кој ја освои престижната Mercury Prize — па сè до Grammy и Brit наградите, Joss Stone стана симбол на современиот соул. Нејзиниот препознатлив, искрен и длабок вокал отвори нова ера во жанрот, а музичката критика често ја става рамо до рамо со Amy Winehouse како една од најзначајните британски музички појави на генерацијата.
Кариерата на Joss Stone е исполнета со храброст, иновативност и глобален успех. Таа настапуваше на најголемите светски сцени, од Glastonbury до престижни арени ширум Европа и Америка, но и организираше уникатни проекти како шестгодишната Total World Tour, со која го обиколи речиси целиот свет. Токму во рамките на таа турнеја, Joss имаше и клупски концерт во Скопје – шоу за кое биле пуштени само 1.000 билети, распродадени буквално за неколку минути.
Ова лето, македонската публика повторно ќе има можност да ја доживее магијата на Joss Stone – овој пат на голема сцена, под отворено небо, во амбиент кој ветува концертно искуство што долго ќе се памети. Големата европска турнеја конечно ја враќа во регионот, а 21 јули станува датум резервиран за едно извонредно музичко патување на Skopje Calling 2026.
Организаторите најавуваат спектакл достоен за светско име, со врвна продукција и сет-листа која ги слави нејзините најпознати хитови, но и новиот творечки правец во кој Joss успешно ги спојува soul, R&B, поп и винтиџ влијанија.
Скопје е подготвено — Joss Stone доаѓа да покаже како изгледа вистинска музичка сила и емоција во живо.
