Првиот македонски долгометражен анимиран филм Јон Вардар против Галаксијата доби значајно меѓународно признание во Кина, каде што беше одликуван со Почесна награда за визуелна имагинација во рамки на главната натпреварувачка селекција на Blue Planet Sci-Fi Film Festival.
Наградата ја доделува организацискиот комитет на фестивалот и претставува признание за исклучителниот визуелен концепт и иновативниот пристап во обликувањето на светот на филмот. Фестивалот е специјализиран за научна фантастика и се фокусира на нови визуелни јазици, авторски израз и технолошки иновации во филмот и анимацијата, што дополнително ја засилува тежината на добиеното признание.
Клучен придонес во визуелниот идентитет на филмот има арт директорот Михајло Димитриевски – Тхе Мичо, еден од најпрепознатливите македонски илустратори. Неговиот стил, препознатлив по спојот на хумор, карикатурална динамика и визуелна слобода, е присутен во бројни меѓународни проекти и фестивали, а токму таа естетика му даде уникатен визуелен печат на филмот.
Режисерот и сценарист Гоце Цветановски истакна дека визуелниот пристап бил клучен уште од најраната фаза на развојот на проектот. Според него, екипата свесно експериментирала со различни анимациски техники, со цел да се приближат 2D и 3D технологиите и да се создаде свет во кој коегзистираат повеќе визуелни естетики. Различните стилови, како што посочи, биле планирани уште при пишувањето на сценариото и служат како дел од карактеризацијата на световите и ликовите.
Ова е седма меѓународна награда за „Јон Вардар против Галаксијата“, филм кој досега беше прикажан на повеќе од 40 фестивали низ светот, потврдувајќи го својот континуиран меѓународен одек и интерес.
Сценариото и режијата се потпишани од Гоце Цветановски, арт директор е Михајло Димитриевски – Тхе Мичо, продуцент е Алан Кастиљо, а гласовите на главните ликови ги толкуваат Жарко Димоски, Емилија Мицевска и Дамјан Цветановски.
