Извозот на европски челик во Соединетите Американски Држави паднал за околу 30% во втората половина од 2025 година, покажуваат податоците на европската челична асоцијација Еурофер. Во индустријата директно го поврзуваат падот со високите американски царини и предупредуваат дека последиците веќе се чувствуваат преку изгубени нарачки и намален пазарен удел.
Трговските тензии се засилија откако во 2025 година беа воведени царини од 50% за увоз на челик и алуминиум во САД – мерка што остана надвор од „избалансираниот“ трговски договор меѓу Европската Унија и Вашингтон. Иако договорот предвиде царини од 15% за поголем дел од европските производи, металите не беа опфатени, што според индустријата ја прави рамнотежата само делумна.
Во август истата година мерките беа проширени и на стотици производи што содржат челик или алуминиум, што дополнително ги погоди европските производители на машини и индустриска опрема – сегмент што традиционално има силно присуство на американскиот пазар.
Од Еурофер предупредуваат дека доколку царините од 50% останат на сила подолг период, европскиот извоз може сериозно да се намали. Според нивните анализи, во 2024 година Европа извезла околу 3,8 милиони тони челик во САД, но трендот на опаѓање е видлив уште од воведувањето на рестрикциите во 2018 година.
Паралелно, Европската комисија работи на нов пакет заштитни мерки за стабилизирање на внатрешниот пазар, со построги квоти и повисоки давачки за увоз над дозволените граници. Европскиот парламент веќе ја поддржа насоката за засилена заштита на индустријата.
Во политички контекст, трговскиот комитет на Европскиот парламент треба да гласа на 24 февруари 2026 за спроведувањето на договорот со САД. За челичниот сектор, сепак, клучното прашање останува исто – дали металите ќе бидат вклучени во вистински пакет за деескалација на царините или 50% ќе стане новото нормално за европскиот извоз.
