Израелските тенкови во четвртокот ја блокираа главната сообраќајница кон Газа, спречувајќи ги оние кои претходно го напуштиле градот да се вратат назад. Министерот за одбрана на Израел, Исраел Кац, изјави дека ова е „последна шанса“ за стотици илјади луѓе кои сè уште се наоѓаат во опколениот град – да избегаат на југ.
Израел ги повика сите жители на Газа да се евакуираат кон јужниот дел, додека армијата започнува една од најголемите офанзиви досега. Целта, според израелските власти, е конечно да се ликвидираат борците на Хамас, кои според нив се „во последните упоришта“ во најголемиот урбан дел од Газа.
Сведоци за Reuters изјавиле дека тенковите поставиле песочни бариери долж главната улица јужно од градот Газа. Луѓето сè уште може да излезат од градот, но на оние што заминале во потрага по храна или засолниште повеќе не им е дозволен повраток.
„Ова е последната можност за жителите на Газа кои сакаат да заминат на југ и да ги остават Хамас оперативците изолирани во градот Газа, каде што ќе се соочат со целосниот обем на операциите на израелската армија (IDF)“, изјави Кац.
Според него, сите што ќе заминат ќе бидат подложени на воени проверки.
Армијата претходно соопшти дека ја започнала операцијата за јакнење и одржување на „оперативната контрола врз коридорот Нетзарим“, стратешко подрачје кое ги поврзува северниот и јужниот дел од Појасот Газа.
„Никогаш нема да заминеме“
Според Обединетите нации, во градот Газа моментално се наоѓаат помеѓу 600.000 и 700.000 луѓе, откако околу 400.000 веќе побегнаа поради напредувањето на израелската армија и уништувањето на згради долж нивниот пат.
Но, не сите сакаат да си заминат. Некои жители за Reuters изјавиле дека новите мерки, кои го спречуваат враќањето, само ја зајакнале нивната решеност да останат.
„Ние нема да заминеме. Вчера дрон исфрли гранати врз покривот на нашата зграда, но ние остануваме тука“, вели Хани (24), жител на градот Газа.
„Се плашиме дека ако заминеме, никогаш повеќе нема да го видиме нашиот дом – Газа“, додава тој.
Во меѓувреме, меѓународната заедница реагира остро. Обединетите нации го осудија пресретнувањето на хуманитарната флотија, истакнувајќи дека Израел, како окупаторска сила, е должен да обезбеди храна и основни средства за населението.
