Израелската војска соопшти дека усмртила локален командант на Хамас во Газа, додека Израел и палестинската милитантна група продолжуваат меѓусебно да се обвинуваат за кршење на примирјето.
Во објавата командантот е идентификуван како Ала Ал-Хадиди, раководител на логистика и еден од командантите на военото производство на Хамас. Се наведува дека бил убиен во еден од нападите врз Појасот Газа во саботата.
Хамас не издаде официјална изјава за наводното убиство.
Израелската војска во саботата изведе воздушни напади врз Газа, за кои премиерот Бенјамин Нетанјаху изјави дека претставуваат одговор на тоа што Хамас испратил борец на територија под израелска контрола.
Нетанјаху рече дека во нападот биле убиени пет високи членови на Хамас.
Здравствените власти во Газа информираа дека во израелските напади биле убиени најмалку 20 Палестинци.
