Израелските власти во четврток започнаа сослушувања за депортација на активистите кои беа притворени од меѓународната хуманитарна флотија која се обидуваше да стигне до блокираниот Појас Газа, соопшти правниот центар „Адалaх“.
Според нив, имиграциските власти во израелското пристаниште Ашдод без најава и без пристап до правна помош почнале постапки против активистите веднаш по нападот од страна на израелските поморски сили на десетици бродови од флотијата доцна во среда и рано наутро во четврток.
„Овие постапки претставуваат тешко кршење на правото на фер судење и основните човекови права на активистите“, наведуваат од „Адалaх“, додавајќи дека ќе преземат правни чекори.
Нивниот правен тим подоцна успеал да добие пристап до пристаништето и да се сретне со активистите, откако првично им било забрането.
Напад на флотијата „Global Sumud“
Флотијата „Global Sumud“, која беше хуманитарна мисија со 443 активисти од 47 земји, беше нападната од израелските сили додека се приближуваше кон брегот на Газа.
Организаторите изјавија дека активистите биле насилно извлечени од бродовите и притворени, нарекувајќи го тоа незаконска киднапирање. Нападот се случи и покрај апелите на меѓународните организации, вклучително и Амнести Интернешнл и ОН, кои предупредија дека било каков напад врз хуманитарен конвој е недозволив.
Според официјалниот тракер на флотијата: 21 брод бил нападнат, за уште 19 се верува дека се цел на напад, а 3 сè уште се на пат кон Газа.
Меѓу активистите имало државјани од Шпанија, Италија, Бразил, Турција, Грција, САД, Германија, Шведска, Франција, Велика Британија и други земји.
Израелските власти изјавија дека сите активисти се пренесени во Ашдод и дека ќе бидат депортирани назад во Европа.
Хуманитарната катастрофа во Газа
Флотијата била натоварена претежно со хуманитарна и медицинска помош, и тргнала кон Газа кон крајот на август — прв пат по многу години повеќе од 50 бродови заедно да се обидат да влезат во блокираната енклава.
Израел ја држи Газа под строга блокада речиси 18 години, која беше дополнително заострена во март со целосно затворање на граничните премини и блокирање на храна и лекови.
Според податоците на ОН, од октомври 2023 година до денес се убиени над 66.000 Палестинци, најмногу жени и деца.
Хуманитарните организации предупредуваат дека: енклавата е на работ на глад и колапс на здравствениот систем, болестите се шират неконтролирано а животот станува невозможно одржлив за 2.4 милиони жители
Израел со години ги напаѓа хуманитарните бродови кон Газа, запленувајќи го товарот и депортирајќи ги активистите.
