Преку структурата на празнична подготвока на храната посетителите ќе имаат можност да ги следат спецификите на сефардската кујна и животниот циклус што го градат етничкиот идентитет на овој народ. Со тоа ќе го запознаат и овој дел од културата на еврејскиот народ во Македонија. Посетителите ќе го осознаат потеклото на терминот „пандишпан“ кој има корен во сефардските јазични корени „пан ди Спања“ или лебот од Шпанија. Еврејската култура, обичаите, кои ја отсликуваат традицијата се своевидни чувари на традицијата и идентитетот на Евреите од овие простори.
Оваа изложба покажува што јаделе Евреите во минатото, што јадат во денешно време и зошто. Фокусирајќи се на карактеристичните јадења, начинот на кој се подготвуваат, нивното потекло и значење, фрла светлина и врз еврејската религиозна практика, историја и култура преку традиционалните јадења и рецепти кои се послужуваат за време на дел од еврејските празници.
Автор на изложбата е м-р Жаклина Мучева.
Изложбата ќе трае до 25.12.2024 година.
