Во рамки на проектот Урбана Агенда – поддршка на независната културна сцена на МКЦ-Битола, а финансиран од Швајцарската амбасада во Скопје, в сабота ќе биде поставена изложбата на уметничка фотографија на Емилија Трајковска.
„Позната по своите црно-бели фотографии, Емилија Трајковска е фотографка којашто не само што го овековечува моментот, туку и го трансформира во една визуелна нарација. Специјализирана во црно-белата фотографија, нејзиниот објектив најчесто ги „заробува“ емоциите на музичката сцена. Нејзина специјалност се фотографиите од бендови, уловени во живо, каде што енергијата на изведбата се пренесува низ играта на светлината и сенките. Таа е раскажувач кој преку своите дела ја документира трансформацијата на музичката сцена. Низ нејзините дела, сцената станува канвас, светлината – боја, а музичарите – субјекти на едно подлабоко, емотивно истражување. Преку експресијата на лицата и интимните моменти меѓу музичарите и публиката, создава динамични композиции каде што секоја сенка и светлосен зрак без зборови раскажуваат за еуфоријата на концертот, екстатичните извици на публиката и за страста и ранливоста на музичарите“, велат организаторите на изложбата.
Изложбата ќе биде поставена на 14 декември 2024 година во МКЦ-Битола (ул. Цар Самоил 29 Битола) со почеток во 19:00 часот.
