Изложба на ракотворби беше отворена вечерва во Дом на култура „Иван Мазов – Климе” во Кавадарци, во соработка со здруженија, физички лица, пензионерки, ученици и слично.
Директорката на културниот дом, Јулијана Туриманџова, појасни дека на изложбата се претставени велигденски ракотворби изработени од вештите раце на овие учесници. Меѓу нив и изработки од ученици и пензионери, изработки од филиграни, како и традиционалната облека како обичај за облекување на празникот Велигден.
– Оваа вечер во нашата галерија имаме неколку поставки во кои ни се претставени обичаите и припремите во деновите пред самиот празник Велигден, истакна Туриманџова.
Таа додаде дека боењето и украсувањето на јајцата е одраз на личната креативност, внимание и љубов.
Притоа ги честита празниците и посака добро здравје и љубов за сите.
