Деновиве од ѕидовите на Културниот дом во Ченто со жолта боја беше прекриен муралот со наслов „Солидарноста е темел на иднината. Жителите се прашуваат која беше потребата да биде избришан симбол кој укажува на заедништвото и единството во градот.
Муралот изработен од Владимир Милиќ направен со партнерство со организацијата „Културно ехо“ и Општината Гази Баба. Беше изработен за 15 издание на фестивалот АКТО во продукција на Факултет за работи кои не се учат како иницијатива за заживување на културниот дом во Ченто. Jа проследуваме изјавата од Филип Јовановски од АКТО, во контекст на важноста на муралот кој го снема од ѕидовите на објектот:
„Муралот на фасадата на напуштениот дом на Култура во Ченто кој се реализираше како дел од програмата на јубилејното 15-то издание (2020) на АКТО фестивалот за современа уметност имаше неколку пораки во себе: Да потсетиме на солидарноста на локалната заедница за време на поплавите – елементарна непогода, која ја зафати Општината во 2016 година, да потсетиме на солидарноста на граѓаните за време на пандемијата со Ковид 19 (во тоа време и се реализираше муралот) и да потсетиме на значењето на културниот (бруталистички) дом за култура во Ченто , кој треба да се обнови и да стане функционален центар за заедницата. Имајќи ги предвид сите овие причини, не ми е разбирливо како е можно да се избрише ова уметничко дело – мурал, кој зборува за самата локална заедница? Па дури и граѓаните да ја постигнале целта и конечно општината да го реконструира овој Локален Дом за култура, сметам дека постојат начини да се искомуницира со авторот на муралот и да се најде начин истиот да се зачува. Во таа насока сметам дека откако објектот ќе се реконструира, Општината би можела да иницира идеја за враќање/реконструкција на муралот, бидејќи и самиот веќе е дел од архитектурата и меморија на објектот како и локалната заедница во Ченто.“ – вели Филип Јовановски од АКТО за Трн.
Оваа уметничка акција беше дел од поголем дел на изработени мурали низ земјата, кои заеднички ја испраќаа пораката за меѓусебна толеранција и поддршка, но и мобилизација на групите и со цел градење на подобро и поправедно општество за сите. Тоа беше и еден од стремежите на АКТО, кои континуирано се занимаваат со еманципација на просторот со цел слобода и права на граѓаните преку јавните простори.
,,Ова го направивме затоа што на објектот поставивме енергетско-ефикасна фасада. Реконструкцијата е во завршна фаза и се очекува да биде пуштен во употреба кон средината на октомври или евентуално, за Денот општината – 3 Ноември, иако крајниот рок, според договорот, е декември” – велат од Општина Гази Баба за Вечер.
