Уставниот суд на Италија пресуди дека небиолошката мајка во истополова заедница има право на татковско отсуство, изедначувајќи ја нејзината улога со онаа на таткото, со што ѝ се признава правото на време за поврзување со новороденчето.
Судот во понеделникот оцени дека уредбата од 2001 година за родителско отсуство е противуставна, бидејќи не признава дека небиолошката мајка во лезбејска граѓанска заедница има право на задолжителното десетдневно татковско отсуство во Италија.
Судот истакна дека интересот на детето да има време со двајцата родители и нивните одговорности не зависат од сексуалната ориентација.
Ова е втора пресуда во само неколку месеци што ЛГБТК+ активистите ја поздравија, во време кога десничарската влада на премиерката Џорџа Мелони се обидува да го ограничи сурогат-мајчинството и да промовира традиционални семејни вредности.
Во мај, уставниот суд пресуди дека две жени можат да бидат регистрирани како родители на дете во изводот од матична книга на родени, нагласувајќи дека признавањето на родителските права не смее да биде ограничено само на биолошката мајка во истополови семејства.
Италија има строги ограничувања за ин витро оплодување и забрана за сурогатство од 2004 година.
Минатата година, под водство на владата на Мелони, државата ја прошири забраната и го криминализираше сурогат-мајчинството и за Италијанците кои одат во странство за да добијат деца преку тој метод.
Пресудата од понеделникот се однесува на жени кои заминале во странство за легално спроведени ин витро третмани.
Како и во мајската одлука, здружението Про живот и семејство ја критикуваше судската пресуда како „апсурдна“, наведувајќи ја како уште еден доказ за тоа како „родовото лудило“ влијае на италијанскиот општествен и правен поредок.
Пратеникот Алесандро Цан, кој со години се залага за поголеми ЛГБТК+ права во Италија, ја поздрави пресудата како историски крај на „неправедна и сурова дискриминација“.
„Правдата ѝ потсетува на владата на едноставен принцип: љубовта е семејство, и секое дете има право на грижа и заштита од двајцата родители, без дискриминација,“ напиша тој на социјалните мрежи.
