Италијанска вечер е вечерва на програмата на фестивалот Охридско лето. Во црквата „Св. Софија“ ќе настапи тенорот Џани Лечезе во пијано придружба на Екланд Хаса. На програмата се дела од Р. Леонкавало, В. Белини, Џ. Пучини, Ди Џакомо, Де Џиоса и други.
Лечезе е ученик на Вилијам Матеуци и Леоне Магиера. Дебитирал во операта „Палјачи“ од Р. Леонкавало во театарот во Пиза, по што настапува со истата улога во Гросето, Пескара, Витербо во рамки на театарските сезони и на фестивали. Неговата интернационална кариера го води на концерти и изведби на оперски претстави во Кина, Индонезија, В. Британија, Грција, Египет, Франција, Чешка, Полска, Јапонија, Кипар, Романија и Бугарија каде неговите изведби се проследени со позитивни одгласи од стручната критика и од публиката. Од 2018 година е уметнички директор на фестивалот на отворено на сцената на Театарот „Каве ди Фантиано“ во Пулиа, Јужна Италија.
Екланд Хаса е роден во Тирана каде дипломирал на Академијата за ликовни уметности. Стекнал различни специјализации во Италија и Германија, а меѓу неговите учители се вклучени и Нихал Хакиу, Пранвера Чауши Кхорџи, Анита Тартарие и Лудвиг Хофман. Тој е наградуваниот уметник, соло пијанист во Театарот за опера и балет во Тирана. Решил да ја напушти Албанија во пострежимскиот период и се преселил во Јужна Италија. Во 2000 година станува уметнички директор на Accademia Lirico – Pop „Аlbano Carrisi”, започнувајќи ја турнејата како пијанист што го однела во цел свет. Соработувал со Инва Мула, Монсерат Кабале, Леонардо Грамења, Ева Големи, Маријана Лека, Емануела Ди Пјетро и многу други.
