Во рамките на 25. Недела на италијанскиот јазик во светот, која оваа година се одбележува од 13 до 30 октомври, ќе се одржи промоцијата на книгата „Италијанската литература и култура на барокот, просветителството и неокласицизмот“ од авторките проф. д-р Ева Ѓорѓиевска и проф. д-р Јована Караникиќ Јосимовска. Настанот ќе се случи во среда, на 29 октомври, во 19 часот, во книжарницата „Литература.мк“ во Diamond Mall.
Изданието на „Арс Ламина“ ќе го промовира проф. д-р Анастасија Ѓурчинова, а на промоцијата ќе се обрати и уредничката Цветанка Стоилова.Книгата претставува значаен придонес кон проучувањето на италијанската книжевност и култура, обединувајќи ги културните, филозофските и книжевните достигнувања на епохите на барокот, просветителството и неокласицизмот.
Авторките преку аналитички и историски пристап ги претставуваат најзначајните претставници на трите епохи и нивното влијание врз европската и светската култура. Меѓу спомнатите се: Џордано Бруно, застапник на хелиоцентричната теорија; Галилео Галилеј, основоположник на емпирискиот метод; Џамбатиста Вико, со својата филозофија на историјата; Џамбатиста Марино, познат по иновативните метафори; Карло Голдони, реформатор на театарот; Џузепе Парини и неговата општествено ангажирана поезија; Виторио Алфјери со своите интроспективни драми, како и Винченцо Монти и неговите игриви дијалози со традицијата и современоста.
Книгата нуди и теоретски и практичен дел – анализи на текстови и извадоци од оригинални дела, со што ја збогатува наставната и истражувачката литература на ова поле.
Паралелно со книжевните аспекти, делото обработува и значајни уметнички остварувања во музиката, архитектурата, скулптурата и сликарството, создавајќи интердисциплинарен увид во богатството на италијанската културна традиција.
