Италија ќе ослободи речиси 10 милиони барели нафта од своите стратешки резерви како дел од заедничката акција на земјите членки на Меѓународната агенција за енергија за справување со актуелната нафтена криза.
Министерството за животна средина и енергетска безбедност на Италија соопшти дека на пазарот ќе бидат пуштени 9.966.000 барели нафта. Ова претставува околу 2,5 проценти од вкупната количина нафта што земјите членки на агенцијата ја ставиле на располагање за стабилизирање на глобалните енергетски пазари.
Во реални количини, тоа изнесува околу 1.605.000 тони нафтен еквивалент, пренесува италијанската новинска агенција Анса.
Според податоците на министерството, задолжителните стратешки резерви на Италија во моментов изнесуваат 11.903.843 тони нафтен еквивалент. Оваа количина е доволна за околу 90 дена нето увоз на нафтени деривати, што е во согласност со обврските предвидени со законодавството на Европската унија.
Ослободувањето на дел од резервите е дел од поширока координирана мерка на меѓународно ниво, чија цел е да се ублажат притисоците врз снабдувањето и цените на нафтата на светските пазари.
