Норвешкиот Нобелов институт побарал помош од меѓународни ИТ експерти за да се истражи сомнително обложување неколку часа пред објавата на добитникот на Нобеловата награда за мир.
Според норвешкиот весник Dagbladet, директорот на институтот Кристијан Берг Харпвикен изјавил дека се ангажирани неколку странски агенции. Тој не открил кои меѓународни партнери учествуваат во истрагата.
Необичното обложување предизвикало шпекулации за можноста од протекување на информации од институтот.
„Не верувам дека имало протекување на информации“
Сепак, Харпвикен рекол дека не верува оти се работи за класично протекување, туку дека институцијата можеби била цел на кибершпионажа.
Во изјава за весникот, тој рекол дека се претпоставува дека сторителите имале финансиски мотив, но не се исклучува ниту политичка заднина.
Лидерот на венецуелската опозиција, Марија Корина Мачадо, не се сметала за фаворитка, но бројот на облози на нејзино име нагло пораснал неколку часа пред објавата дека токму таа е добитничка на наградата.
Некој вложил 67.820 долари
Според весниците Aftenposten и Finansavisen, веројатноста таа да победи драстично скокнала преку ноќ во една обложувалница, само неколку часа пред објавувањето на одлуката. Поради тоа, Нобеловиот институт покренал истрага.
Според извештаите, неколку облози со петцифрени суми биле ставени на нејзино име во текот на таа ноќ.
Една личност вложила 67.820 американски долари — и тоа ѝ била првата обложувачка активност на таа платформа.
