Во светот каде што вештачката интелигенција (ВИ) е сѐ поприсутна во секојдневниот живот, потребата за нејзино регулирање станува сѐ поизразена. Новото истражување на Фондацијата Метаморфозис има цел да покаже како новите технологии и ВИ влијаат врз човековите права на интернет.
На 13 март оваа година, Европскиот парламент донесе историски закон за регулирање на вештачката интелигенција (AI Act), со што направи значителен чекор кон контролирање на технологиите кои можат да имаат огромно влијание врз човечкото општество. Во Македонија, на иницијатива на Фондот за иновации и технолошки развој, се формираше работна група за креирање на Национална стратегија за вештачка интелигенција уште во 2021 година, но конкретни чекори сѐ уште не се преземени.
Истражувањето на Фондацијата Метаморфозис нагласува дека брзиот развој на ВИ предизвикува измешани чувства, од почит и восхит до страв. Без соодветна контрола и законска рамка, постои реална можност за нарушување на човековите права на интернет. ВИ веќе е дел од нашето секојдневие, на работните места, социјалните медиуми и мобилните апликации, што ја прави потребата за регулација уште поитна.
Во своето истражување, Метаморфозис посочува дека, иако ВИ има огромен потенцијал за да служи за добро на луѓето, постои реална опасност од нејзина неетичка употреба. Затоа е важно да се воспостават регулативи кои ќе ги заштитат човековите права на интернет и ќе обезбедат правична и етичка употреба на технологијата.
Фондацијата препорачува пет етички стандарди кои треба да се почитуваат при креирање политики за ВИ: објаснивост и проверливост, достоинство, забрана за предизвикување штета, правичност и општествено одговорна употреба на податоците. Овие стандарди ќе обезбедат сигурност, доверливост и одговорност, гарантирајќи зачувување на човечкото достоинство.
Со ова истражување, Метаморфозис има цел да го насочи развојот на ВИ кон почитување на човековите права, што е особено важно во време кога оваа технологија се развива со невидена брзина. Деталите од истражувањето можете да ги прочитате овде.
