На 18 март од 12:00 до 13:30 часот, во Europe House Skopje ќе се одржи промоција на публикацијата „Историја на жените во Македонија кон крајот на XIX и во првата половина на XX век“, во организација на ХЕРА и Тиииит! Инк.
Настанот ќе ја претстави новата читанка која го истражува придонесот на жените во општествените, политичките и културните процеси во Македонија.
Публикацијата претставува историска читанка која има за цел да го надополни недостатокот на женски наративи во наставата и јавниот историски дискурс. Таа нуди критички пристап кон минатото, со фокус на улогата и искуствата на жените во различни општествени сфери.
Во неа се обработуваат теми како политичкото дејствување на жените, нивната улога како работнички, развојот на женското образование, како и придонесот во здравството и социјалната заштита. Материјалите се базираат на историски извори, сведоштва и фотографии кои ја осветлуваат женската перспектива.
Публикацијата е подготвена од истражувачки тим составен од Петар Тодоров, Јана Трајковска, Дарко Леитнер-Стојанов и Јана Коцевска и е наменета за ученици, наставници, истражувачи и пошироката јавност.
Во рамки на настанот ќе се одржи разговор со авторите, при што ќе се дискутира за процесот на истражување, користените извори и значењето на вклучувањето на женската перспектива во изучувањето на историјата.
Поради ограничен број на места, присуството е можно само со претходна регистрација.
Настанот отвора простор за поширока дебата за видливоста на жените во историјата и нивната улога во обликувањето на општеството.
