Иран денеска упати остро предупредување до Соединетите Американски Држави и Израел, наведувајќи дека неговите вооружени сили се во состојба на „висока подготвеност“. Изјавата доаѓа по распоредувањето американски воени сили во Персискиот Залив и во контекст на зголемените тензии околу иранската нуклеарна програма и можните нови преговори.
Командантот на иранската армија, Амир Хатами, изјави дека секој евентуален напад би имал сериозни последици не само за напаѓачите, туку и за целиот регион. „Ако непријателот направи грешка, несомнено ќе ја загрози сопствената безбедност, безбедноста на регионот и безбедноста на ционистичкиот режим“, рече Хатами, нагласувајќи дека иранските вооружени сили се во целосна подготвеност.
Тој додаде дека нуклеарното знаење и технологијата на Исламската Република Иран не можат да бидат уништени, дури и ако иранските научници „станат маченици“. Со ова, Хатами алудираше на претходните напади врз ирански нуклеарни инсталации и научници, особено за време на 12-дневниот конфликт во јуни, кога Израел започна воена операција против ирански цели.
Тензиите дополнително се зголемија по серијата протести во Иран, кои режимот ги задуши на почетокот на јануари. Во тој период, американскиот претседател Доналд Трамп во повеќе наврати упати закани за можни напади врз Иран. Истовремено, Трамп врши притисок врз Техеран да прифати нов нуклеарен договор и во петокот изјави дека сака да се постигне договор, без да прецизира временска рамка.
Од иранска страна, министерот за надворешни работи Абaс Арагчи не ја исклучи можноста за учество во разговори, доколку тие бидат „фер и рамноправни“. Тој повтори дека Иран „никогаш не тежнеел да се стекне со нуклеарно оружје“, но нагласи дека одбранбените капацитети и ракетната програма на земјата „никогаш нема да бидат предмет на преговори“.
Западните сили со години изразуваат сомнежи дека Иран се обидува да развие нуклеарно оружје, што Техеран постојано го негира. Новите закани од Вашингтон, вклучително и изјавата на Трамп дека евентуален напад би бил „далеку полош“ од јунискиот, ја зголемуваат неизвесноста околу идните дипломатски и безбедносни чекори на Блискиот Исток.
