Како што се приближува почетокот на Светското првенство во фудбал, се појавува можност ФИФА да мора да бара замена за еден од учесниците.
Иранскиот министер за спорт Ахмад Доњамали изјави дека Иран под никакви околности нема да учествува на турнирот, откако САД и Израел извршија воздушни напади врз Иран и беше убиен иранскиот врховен лидер Али Хамнеи.
„Со оглед на тоа што овој корумпиран режим го уби нашиот лидер, ние под никакви околности не можеме да учествуваме на Светското првенство“, изјави Доњамали за државната телевизија.
Тој додаде дека безбедносната ситуација во земјата е сериозна и дека нема услови за учество на голем спортски настан.
„Во последните осум или девет месеци ни беа наметнати две војни и убиени се неколку илјади наши граѓани. Поради тоа немаме можност да учествуваме на Мундијалот“, истакна министерот.
Иранската репрезентација треба да игра во групата Г заедно со Белгија, Египет и Нов Зеланд. Сите три натпревари се планирани да се одиграат во Соединетите Американски Држави – два во Лос Анџелес и еден во Сиетл.
ФИФА засега не се огласила по повод изјавата на иранскиот министер. Според правилата на организацијата, секоја репрезентација која ќе се повлече од турнирот може да биде парично казнета, а можно е и дополнително дисциплинско казнување или замена на учесникот.
Претседателот на ФИФА, Џани Инфантино, претходно изјави дека разговарал со американскиот претседател Доналд Трамп, кој му рекол дека иранската репрезентација е добредојдена да учествува на Светското првенство што ќе се одржи во САД.
