Иранскиот министер за надворешни работи Абас Арагчи упати досега најдиректна јавна закана кон Соединетите Американски Држави, предупредувајќи дека Иран ќе возврати „со сè што има“ доколку повторно биде нападнат. Предупредувањето доаѓа во период на зголемени тензии на Блискиот Исток и движење на американска група носачи на авиони од Азија кон регионот.
Во авторски текст објавен во Wall Street Journal, Арагчи наведува дека Иран повеќе нема да покажува воздржаност како во јуни 2025 година, кога, според него, земјата се соочила со директни напади за време на дванаесетдневниот конфликт што го иницирал Израел.
„За разлика од тогашната воздржаност, нашите моќни вооружени сили немаат никакви ограничувања да возвратат со сè што располагаат, доколку повторно бидеме нападнати“, напиша Арагчи.
„Ова не е закана, туку реалност“
Иранскиот министер тврди дека неодамнешните немири во земјата, кои резултираа со судири меѓу безбедносните сили и демонстрантите, влегле во „насилна фаза“ што траела помалку од 72 часа, обвинувајќи ги демонстрантите за ескалацијата.
„Ова не е закана, туку реалност што чувствувам обврска јасно да ја соопштам. Како дипломат и ветеран, јас го презирам војувањето“, додава Арагчи, предупредувајќи дека евентуален конфликт би бил жесток, би го зафатил целиот регион и би имал последици врз обичните луѓе ширум светот.
Откажано учество на Давос
Поради актуелната состојба во Иран, на Арагчи му е откажано учеството на Светскиот економски форум во Давос. Од организацијата соопштија дека, иако иранскиот министер бил поканет уште минатата есен, „трагичната загуба на цивилни животи во изминатите недели“ ја прави несоодветна застапеноста на иранската влада на форумот оваа година.
Заканата од Техеран доаѓа во момент кога меѓународната заедница внимателно ја следи безбедносната динамика на Блискиот Исток, а дипломатските канали се под зголемен притисок поради можноста од нова поширока ескалација.
