Иран јавно ја оттурна американската понуда за прекин на огнот и преку државни медиуми испрати порака дека војната ќе заврши само кога ќе бидат прифатени неговите услови. Наместо кратко примирје, Техеран сега бара многу повеќе: запирање на нападите врз неговите функционери, гаранции дека нема да има нова војна, репарации и признавање на неговата контрола врз Ормускиот Теснец.
Според Reuters, засега е потврдено дека Иран ја одбил американската 48-часовна понуда за прекин на огнот. Агенцијата, повикувајќи се на неименуван извор пренесен од полуофицијалната иранска агенција Fars, објави дека предлогот бил доставен преку посредничка држава. Американска официјална потврда за таква конкретна понуда засега нема.
Дополнителен контекст даде Associated Press, кој објави дека иранската државна телевизија Press TV, повикувајќи се на анонимен официјален извор, пренела ирански план во пет точки. Во него се бара запирање на убивањата на ирански функционери, гаранции дека нема да има нова војна против Иран, репарации, крај на непријателствата и признавање на иранскиот суверенитет над Ормускиот Теснец.
Во меѓувреме, САД не покажуваат дека се подготвени да ги прифатат тие позиции. Портпаролката Каролајн Ливит изјави дека разговорите со Иран продолжуваат и дека се „продуктивни“, но предупреди и дека може да следуваат нови удари доколку Техеран не ја прифати „реалноста на моментот“.
Сето тоа покажува дека ставовите на двете страни и натаму се далеку една од друга. Додека Вашингтон зборува за можен договор и продолжување на разговорите, Техеран возвраќа со цврста линија и услови што тешко можат да бидат прифатени од американска страна. Особено чувствителни се барањето за репарации и прашањето за Ормускиот Теснец, кој останува едно од најжешките безбедносни и енергетски жаришта во кризата.
