Иранската Револуционерна гарда (IRGC) потврди дека лансирале масовен одмазднички напад со ракети и дронови кон Израел и американски воени бази на територијата на пет земји од Персискиот Залив. Ударите претставуваат директен одговор на американско-израелската операција „Епски бес”, во рамките на која беа бомбардирани цели низ цел Иран уште во раните утрински часови.
Пет земји под удар
Бахреин беше меѓу првите погодени — штабот на американскиот 5-ти флот во Манама беше погоден со ракетен напад, што Бахреин официјално го потврди. Над Катар беа пресретнати повеќе ирански ракети со системот Патриот, но жители на Доха пријавија силни експлозии веднаш по соопштението на Министерството за одбрана дека сите проектили биле неутрализирани. Во Кувајт беше таргетирана базата „Ал Салем”, а во Обединетите Арапски Емирати беше пријавена силна детонација во близина на Абу Даби, каде е сместена базата „Ал Дафра”. Воздушни тревоги огласени беа и во Јордан, преку чија територија поминаа дел од проектилите.
Израел под ракетен напад
Израелската армија потврди дека детектирала ракети лансирани од Иран и активирала противвоздушни системи за нивно пресретнување. Воздушни аларми огласени беа низ повеќе региони на земјата, а граѓаните беа повикани итно да се засолнат. Неколку болници ги активираа протоколите за вонредни состојби и ги преместија пациентите во подземни простории.
IRGC: „Ова е само првиот бран”
IRGC соопшти дека лансирал „прв голем бран” на ракетни и дронски напади, насочени кон Израел и американските воени бази во регионот. Иранските воени структури претходно предупредуваа дека во случај на напад ќе бидат таргетирани сите американски сили присутни во регионот, нарекувајќи ги нивните бази „ахилова пета на оваа воинствена сила”.
Нападите врз Иран се втори во рок од помалку од една година, откако американско-израелската операција „Растечки лав” во јуни 2025 погоди ирански нуклеарни постројки.
