Ирак привремено ја прекина работата на своите нафтени терминали по нападите врз два танкери во Персискиот Залив, во кои загина еден член на екипажот. Одлуката ја соопшти директорот на Генералната компанија за управување со пристаништа на Ирак, Фархан ал-Фартуси, додека комерцијалните пристаништа во земјата продолжуваат да функционираат.
Нападот се случил во ирачки територијални води, во близина на нафтеното пристаниште Басра. Двата танкери се запалиле по ударот, а спасувачките екипи успеале да евакуираат 38 членови на екипажот од бродовите.
Според првичните проценки на безбедносните служби, танкерите биле погодени од експлозивни пловила или поморски дронови. Нападот е дел од пошироката ескалација на безбедносната ситуација во Персискиот Залив, каде од средата се регистрирани најмалку шест напади врз бродови.
Ормускиот теснец, една од најважните светски поморски рути за транспорт на нафта, повторно станува клучна точка на тензиите во конфликтот поврзан со Иран.
Ирачката државна компанија за трговија со нафта SOMO предупреди дека инцидентите „негативно влијаат врз безбедноста и економијата на Ирак“, особено затоа што голем дел од ирачкиот извоз на нафта се одвива преку терминалите во јужниот дел на земјата.
Ескалацијата во регионот веќе има последици и на глобалните пазари. Цената на нафтата Brent повторно се искачи над 100 долари за барел, бидејќи нападите врз танкери и инфраструктура го загрозуваат транспортот на нафта низ Персискиот Залив.
Аналитичарите предупредуваат дека доколку нападите продолжат и ако Ормускиот теснец стане небезбедна рута за танкерите, тоа би можело дополнително да ја зголеми цената на нафтата и да предизвика нови нарушувања на глобалниот енергетски пазар.
