На почетокот, страста е силна, спонтана и постојана. Но, по неколку години заеднички живот, кај многу парови сексуалниот нагон значително се намалува. Зошто се случува тоа, и дали постои начин повторно да се разбуди блискоста?
Од страст до рутина
„Секс? Можеби еднаш на неколку месеци.“ — ова, според психолозите, е сè почесто слушната реченица во ординациите. Луѓе со стабилни врски, работа и деца, често се чувствуваат фрустрирани бидејќи страста што некогаш ја имале, исчезнала.
Психотерапевтката Андреа Зајферт од Хамбург објаснува дека тоа е нормален биолошки процес.
„На почетокот на врската, комбинацијата на адреналин, допамин и тестостерон создава експлозија на желба. Подоцна, хормоните што ја поттикнуваат поврзаноста — како окситоцинот — ја преземаат главната улога и ја пригушуваат сексуалната возбуда,“ вели таа за Deutsche Welle.
Тоа не значи дека љубовта исчезнува — туку дека телото преминува во поинаква, подлабока фаза на емоционална врзаност.
„Што сакам јас, што сакаш ти?“
Кога сексуалниот живот почнува да слабее, првиот чекор, според Зајферт, е — разговорот.
„Парот треба да разговара отворено: што ми недостасува, што ме возбудува, што не ми одговара,“ вели таа.
Многу луѓе, особено жени, не ја разбираат целосно сопствената сексуалност, бидејќи врз неа влијаат претходни искуства, воспитување и културни норми.
Женската сексуалност е посложена
Професорката по психологија Мередит Чиверс од Универзитетот Квинс во Канада објаснува дека кај жените често постои разлика помеѓу физичкото и емотивното возбуда.
„Жените можат телесно да реагираат на сексуални стимули, но тоа не значи дека навистина чувствуваат желба,“ објаснува таа.
Причината, според неа, лежи во заштитната биолошка функција – телото реагира автоматски за да спречи физичка повреда дури и во непосакувани ситуации.
Затоа, кај жените сексуалното искуство зависи повеќе од контекстот, довербата и емоционалната поврзаност, отколку само од физиологијата.
Родови разлики и „јазот во оргазмот“
Истражувањата покажуваат дека во хетеросексуалните односи и понатаму постои голема нерамнотежа во сексуалното задоволство.
Додека 70–100% од мажите доживуваат оргазам за време на однос, кај жените тој процент е само 30–60%.
„Кога жената не е задоволна сексуално, со текот на времето тоа ја намалува нејзината желба. Сексот станува обврска, не интимност,“ вели психологот Натали Розен.
Поврзаност, не само секс
Психотерапевтката Зајферт додава дека често сексуалноста умира таму каде што умира нежноста.
Парови што повеќе не се прегрнуваат, не се бакнуваат и не се допираат, полесно ја губат сексуалната хемија.
„А потоа доаѓа викендот и некој очекува секс — тоа за многумина звучи како скок од десет метри без загревање,“ вели таа со насмевка.
Затоа, првиот чекор не е нужно во креветот — туку во секојдневните мали гестови. Прегратка, допир, насмевка — тие се градбени елементи на желбата.
Како повторно да се разбуди страста
Клучот е во комуникацијата и свесната физичка близина.
Не мора секој допир да води до секс, но секоја блискост ја зајакнува поврзаноста.
Кај некои парови, помага и мала дистанца — време за себе, нови искуства и повторно откривање на индивидуалноста.
„Желбата не доаѓа секогаш сама по себе,“ вели Зајферт.
„Понекогаш треба свесно да создадеш простор за неа.“
Истражување на психологинката Ејми Мјус покажува дека паровите кои се гушкаат и остануваат блиски по сексот се позадоволни, посреќни и имаат подолготрајна врска.
На крајот, решението не е во совршен секс, туку во времето, вниманието и нежноста што парот ги вложува еден во друг.
Интимноста не исчезнува – таа само чека да ѝ се посветиме повторно.
Извор: N1info.rs
