Под силен притисок од администрацијата на претседателот Доналд Трамп, Индија започнува да го преиспитува својот енергетски курс и полека се откажува од купување руска нафта, објави Deutsche Welle.
Американската влада минатата недела воведе санкции против руските енергетски гиганти „Лукоил“ и „Росњефт“, вклучувајќи и секундарни санкции за индиски банки, рафинерии и транспортни компании што соработуваат со нив. Компаниите кои не ги намалат трансакциите до 21 ноември ризикуваат да се најдат на американската „црна листа“.
Покрај тоа, САД најавија царини од 50% на дел од индискиот извоз, како дополнителен обид да ја натераат Индија да ја прекине трговијата со Москва.
Иако индискиот премиер Нарендра Моди не ја потврди изјавата на Трамп дека Индија ќе престане да купува руска нафта, неколку големи компании веќе прават промени. Reliance Industries, најголем индиски увозник на руска сурова нафта, најави дека „го проценува влијанието“ на западните санкции и ќе го прилагоди своето работење на новите услови.
Поранешната амбасадорка на Индија во САД, Мира Шанкар, оцени дека Вашингтон вешто избегнува целосна забрана на руската нафта бидејќи тоа би ги зголемило светските цени. „Ова е притисок насочен кон Москва, но и порака до Њу Делхи,“ изјави таа.
По руската инвазија врз Украина во 2022 година, Индија значително го зголеми увозот на евтина руска нафта, со што Русија стана нејзин најголем снабдувач. Сега, под санкциски притисок, индијските рафинерии бараат алтернативи.
Според професорката Лекха Чакраборти од Институтот за јавни финансии во Делхи, рафинериите веќе го зголемуваат увозот од Ирак, Саудиска Арабија и Обединетите Арапски Емирати, кои сега сочинуваат повеќе од 40% од вкупниот увоз.
Иако официјално Индија не објави целосно повлекување од руската нафта, аналитичарите предупредуваат дека санкциите би можеле да ја ограничат нејзината енергетска флексибилност и да создадат финансиски ризици за домашните компании.
Поранешниот професор по економија Арун Кумар вели дека Њу Делхи нема друг избор освен да попушти. „Индија и во минатото ги почитуваше барањата на САД – при прекинот на увозот од Иран и Венецуела. Сега ќе мора повторно да го направи истото,“ нагласи тој.
Во меѓувреме, се шпекулира дека дел од индиските рафинерии би можеле да продолжат со купување руска нафта преку посредници од трети земји, избегнувајќи директни прекршоци на санкциите.
Извор: Index.hr
