На аеродромот Хитроу во Лондон утрово се случи инцидент поради кој интервенираа бројни итни служби. Неколку лица беа изложени на супстанца за која се верува дека е сузавец, а полицијата трага по други осомничени. Инцидентот се случи на повеќекатниот паркинг пред Терминал 3, а неколку лица побараа лекарска помош, при што повредите не се сметаат за сериозни.
Лондонската служба за итни случаи прогласи „значаен инцидент“ и на терен беа испратени сите расположливи ресурси, вклучително и пожарникари и полиција. На социјалните мрежи се објавени снимки од поголем број на вооружени полицајци и приведување на едно лице.
Инцидентот предизвика нарушувања во сообраќајот: привремено беше затворен јужниот крак од автопатот M4 и дојде до задоцнувања на линиите Elizabeth и Piccadilly. Управата на аеродромот ги советува патниците да предвидат дополнително време за доаѓање и да се обратат до своите авиокомпании за информации.
