Илјадници граѓани и будистички монаси, носејќи цветови од лотос, како и камбоџански и будистички знамиња, учествуваа во симболичен босоног марш долг 3,3 километри низ градот Сием Реап, испраќајќи порака за мир во момент кога Камбоџа и Тајланд започнаа преговори за можен прекин на огнот.
Маршот беше одржан истиот ден кога воените делегации на двете земји ги започнаа првите официјални разговори по повторното избувнување на судирите на 8 декември. Средбата се одржа во тајландската провинција Чантхабури, а според локалните медиуми траела помалку од еден час.
Иако засега нема официјално соопштение за исходот од разговорите, тајландскиот јавен сервис Thai PBS објави дека воените преговори ќе продолжат. Камбоџа претходно предложи состанокот да се одржи во Малезија, но Тајланд го одби тој предлог.
Во сабота е планирано заседание на Заедничкиот граничен главен одбор, со кое заеднички би претседавале министрите за одбрана на двете земји. Сепак, Тајланд предупреди дека состанокот нема да се одржи доколку претходно не се постигне согласност за клучни технички прашања, како што се распоредот на силите и конкретните мерки за обезбедување прекин на огнот.
Борбите засега продолжуваат
И покрај дипломатските напори, борбите продолжуваат во пограничните региони меѓу двете земји. Камбоџанското министерство за одбрана соопшти дека тајландските сили денес истрелале гранати кон областа Појпет и провинцијата Бантеј Меанчеј, при што биле ранети двајца цивили.
Се наведува и дека дошло до размена на оган во близина на храмот Преах Вихеар, вклучително и употреба на ракетни системи БМ-21.
Од друга страна, Тајланд соопшти дека уништил два објекта во пограничниот град Појпет, за кои тврди дека биле користени за нелегални активности и складирање муниција. Тајландските медиуми исто така известуваат за продолжување на судирите на повеќе точки долж границата.
Според камбоџански извори, тајландски борбени авиони ги бомбардирале провинциите Бантеј Меанчеј и Батамбанг.
Од почетокот на конфликтот, речиси еден милион луѓе се раселени од двете страни на границата, додека меѓународната заедница повикува на итна деескалација и трајно решение на судирот.
