Тужбата се темели на внатрешни документи и научни извештаи до кои дошол Би-Би-Си, според кои Johnson & Johnson уште во 1960-тите години знаел дека неговата талк-пудра содржи влакнести минерали, меѓу кои и тремолит и актинолит. Во нивната влакнеста форма, овие минерали се класифицираат како азбест, кој е поврзан со болести како мезотелиом и рак на јајници.
Според судските документи, компанијата никогаш не ставила предупредување на пакувањето, туку напротив – водела агресивни маркетинг кампањи што го претставувале производот како „симбол на чистота и нежност“.
Johnson & Johnson ги негира обвинувањата, тврдејќи дека нејзината пудра „секогаш ги исполнувала сите регулаторни стандарди, не содржи азбест и не предизвикува рак“. Продажбата на талк-пудра во Обединетото Кралство престана во 2023 година, три години по престанокот на продажбата во САД.
Тужителите тврдат дека уште во 1973 година, внатрешни меморандуми покажувале дека J&J идентификувал присуство на азбестови влакна во пудрата, но наместо да ја повлече од продажба, компанијата се обидела да го сокрие проблемот. Еден од документите гласи:
„Нашата пудра содржи честички талк кои можат да се класифицираат како влакна… Повремено се забележуваат траги од тремолит или актинолит.“
Во друг допис од истата година, раководители на компанијата дискутирале дека треба „целата работа да се задржи доверлива“ за да не се дознае во јавноста дека пудрата содржи азбест.
Се наведува и дека компанијата вршела притисок врз американската Агенција за храна и лекови (FDA) за да прифати помалку чувствителни стандарди за тестирање, со цел да не се откриваат мали количества на азбест во производите.
Меѓу тужителите е и Сиобан Рајан (63) од Сомерсет, која користела пудра Johnson & Johnson целиот живот. „Мајка ми ја користеше, јас ја користев, а потоа и на моите бебиња. Мирисаше прекрасно. Никогаш не помислив дека нешто толку невино може да биде опасно,“ изјавила таа за BBC.
Пред 18 месеци ѝ бил дијагностициран четврти стадиум на рак на јајници. По неколку циклуси хемотерапија и тешка операција, Рајан денес повторно се лекува од поврат на болеста. „Тие знаеле дека е контаминирана, а сепак ја продаваа на мајки и нивните бебиња,“ вели таа низ солзи.
Британските адвокати проценуваат дека штетите би можеле да достигнат стотици милиони фунти, што може да ја направи оваа постапка најголем случај за одговорност на производител во историјата на Велика Британија.
Оваа тужба ја следи долгогодишната правна сага во САД, каде што Johnson & Johnson веќе плати милијарди долари отштета на жртви со слични обвинувања, иако дел од случаите беа поништени по жалби.
По пресудата во американската држава Конектикат, каде судот ѝ наложи на J&J да плати 25 милиони долари на маж со терминален рак предизвикан од пудрата, компанијата најави жалба.
Во изјава на новата компанија Kenvue – во која J&J го префрли делот за потрошувачки производи – се наведува:
„Длабоко сочувствуваме со сите кои живеат со рак. Разбираме дека тие и нивните семејства бараат одговори – затоа фактите се толку важни.“
Kenvue и понатаму тврди дека пудрата е безбедна и поддржана со години независни тестирања од водечки лаборатории и здравствени институции ширум светот.
Сепак, за илјадници луѓе како Сиобан Рајан, прашањето не е само за законска одговорност, туку за довербата во еден бренд кој – како што велат – „ги изневерил токму оние што најмногу му верувале: мајките и нивните бебиња“.
Извор: BBC
