Израелските одбранбени сили (IDF), во текот на ескалацијата на конфликтот меѓу Израел и САД со Иран, објавија дека ги елиминирале „сите високи лидери на иранската терористичка оска која закануваше дека ќе не уништи“. „Ги елиминиравме сите високи лидери на иранската терористичка оска која ни закануваше со уништување“, соопштија од IDF.
Иранскиот врховен лидер, ајатолах Али Хамнеи, беше убиен во својот комплекс во Техеран, објавија иранските државни медиуми. Државната новинска агенција Fars извести дека Хамнеи бил убиен вчера рано наутро „во својот кабинет во резиденцијата на лидерот“ додека „ги извршувал своите должности“, што предизвика поделени реакции меѓу населението. Додека некои плачеле, други славеле на улиците на Иран.
IDF објави и дека во вчерашните почетни удари врз Иран биле убиени 40 „критични“ ирански воени команданти, вклучувајќи го и началникот на Генералштабот Абдолрахим Мусави.
Убиен е и поранешниот ирански претседател
Според изјавите на армијата, Мусави бил одговорен за „управување со иранскиот безбедносен апарат и надзирање на лансирањето стотици балистички проектили кон израелска територија, кои убиле израелски цивили за време на операцијата“.
Во израелските воздушни напади убиен е и поранешниот ирански претседател Махмуд Ахмадинеџад, кој ја водеше земјата од 2005 до 2013 година. Во нападот била погодена неговата резиденција во Наранк, на североистокот од Техеран. Во нападот биле убиени Ахмадинеџад и неколку негови телохранители, објави медиум блиску до режимот.
За време на својата политичка кариера, Ахмадинеџад бил познат како радикален конзервативец и отворен застапник на антизападна политика, а неговиот претседателски мандат бил обележан со чести изјави во кои изразувал екстремна омраза кон Израел.
